Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Serchhip District-a Total Lockdown kalpui chhunzawm dan tur sawiho a ni

Serchhip District Level Task Force on COVID-19 Member te leh Serchhip Joint VC hruaitute bakah Village Council hrang hrang aiawhte chuan nimin khan hri leng avanga Serchhip District-a Total Lockdown kalpui chhunzawm dan tur an sawiho.

He sawihona Serchhip DC Meeting Hall-a neih hi District Bawrhsap mawhphurhna la mektu Lalmuansanga Ralte chuan kaihruaiin heng sawrkar thupek kenkawhna kawngah hian Village Level Task Force te chu an hmachhuan leh an kutke pui ber an ni tih sawiin, he hripui laka mipuite an him zel theih nan theihtawpa tang chhunzawm zel turin a chah a, an thawhrimna zarah Serchhip pawh kan ziaawm hle nia a hriat thu sawiin, a tul anga anmahni tanpui turin an inring reng tih a sawi a, engtiklai pawha biak theih an nih thu a sawi bawk.

He hunah hian Serchhip SP, Stephen Lalrinawma chuan kumin-a inkhuahkhirhna khauh zawk kalpui a nih atanga hma an lak tawh dan tlangpui sawiin, Dan bawhchhia an man te chawi tling khawm pawh Rs. 35,800 a nih tawh thu a sawi bawk.

State Executive Committee thuchhuak anga he inkhuahkhirhna kalpui chhunga District Level lamin a lo rel ve theih awm ang ang te leh Chief Minister Relief Fund Serchhip District in a hmuh sem dan turte ngaihtuahho a ni a. Dawr hawn hunbi dik taka kalpui a, feh hunbi pawh zing dar 9:00 hmaa khawchhung chhuansan hman a, tlai dar 4:00 hnuah chauh haw theih ni se tih te, Serchhip District chhung khaw danga dawr neituten Serchhip Wholesale dawr te an rawn dawr theih nan Nilaini leh Ningani-ah hun siam saka, an rawn dawr duh Wholesale dawr awmna VLTF te nena ruahmanna siama lo enpui ni se tih te sawi a ni.

Chief Minister Relief Fund atanga Serchhip District in Rs. 2,50,000 an dawn sem dan tur pawh uluk taka sawi a ni a, tunah hian VLTF te chu an bial chhunga chhuanchham tawk theite thehluh tir mek a ni a, he report mil hian DC Office lamin sem chhuak mai se tha an ti bawk. He Meeting hian a tul thuta hnathawk mai thei turin Disinfectant Team din an rel bawk a ni.

Comments

Chhiar Hlawhte