A thlawnin buhfai sem dawn

Sawrkar laipui in PMG-KAY hnuaia Ration buhfai a thlawna sem leh tura ruahmanna a siam angin tunkar atang khian Mizoram-ah pawh Ration buhfai hi semchhuah tura ruahman a ni.

Hemi chungchanga Serchhip DCSO hnen atanga thu kan dawn danin AAY, PHH leh Non-NFSA Beneficiary te hnenah May thla quota hi sawrkar in ruahmanna a siam angin May thla chawlhkar hnihna, tunkar atang khian sem tan tum a ni a, ruahman lawk ang chuan Ration pangngai, AAY Card nei tan Ration Card pakhat ah Kg. 35 zel, PHH Ration Card nei tan mi pakhat ah Kg 5 zel, Non-NFSA tan mi pakhat-ah Kg 8 zel sem tur niin hei bakah hian PMG-KAY hnuaiah AAY leh PHH te tan Kg 5 zel a thlawnin sem belh tur a ni dawn a, hei hi May thla chawlhkar hnihna atanga mipuite hnena sem thei turin Supply Centre atanga pekchhuah hman tura ruahman a ni bawk.

Hetianga ruahmanna siam a nih avang hian PHH beneficiary ten thla tin kg. 3 zel kg. khat Rs. 15/- hisap-a an lak thin chu May thla hian sem a ni dawn lova, Retailer te hian e-Pos device leh Weighing Scale hmangin online in Ration hi semchhuah vek tur a ni bawk.