WHO in Mizoram tan Oxygen Concentrator 150 pe

World Health Organization (WHO) chuan Mizoram-a COVID-19 hri kai damlo Oxygen mamawhte hman tur Oxygen Concentrator 150 Mizoram sawrkar a rawn pe.

Heng Oxygen Concentrator te hi nimin khan Mizoram Scretariat kawt zawl-ah Dr. Lalhlimpuii, Surveillance Medical Officer, WHO, India, Aizawl chuan Health Minister Dr R. Lalthangliana kutah a hlan a, Dr. R. Lalthangliana chuan WHO in Mizoram a hripui vanga damlo te mamawh pawi-mawh tak mai Oxygen Concentrator 150 lai a rawn pek avangin Zoram mipuite aiawhin thinlung takin lawmthu a sawi a, heng khawl hlu tak te hian nunna tam tak a chhanchhuak ngei dawn a ni, a ti bawk.

Health Minister chuan WHO hnen atanga kan thil dawn hi tum khata Oxygen Concentrator kan dawn tam ber tum a la nih thu sawiin, a hmain Switzerland atang Oxygen Concentrator 100, Ireland atangin 60, United Kingdom atangin 50 leh Taiwan atangin 15 kan lo dawng tawh tih a sawi a, Egypt atangin Oxygen Cylinder D-Type 50 leh Oxygen Regulator 50, Switzerland atangin Oxygen Nasal Canula 5000 leh Power Adapter 100 kan lo dawng tawh bawk tih sawiin, tunah hian Kuwait atang Oxygen Cylinder Pellet 4 (180 cylinders), Spain atangin Oxygen Nasal Tube 900 leh USA atangin Viral Transport Media Tube 300 kan dawng leh dawn a ni, a ti bawk.

Dr. R. Lalthangliana chuan World Health Organization (WHO), Country Office for India hotute hnenah nimin khan lawmthu sawina D.O. Letter thawn nghalin, Mizoram-in COVID-19 hri dona kawnga hma a lak dan leh hnathawh dan chi hrang hrang a tarlang a, Mizoram-in kan mamawh em em PPE kit, RAgT kit leh RT-PCR test kit kan mamawhna sawiin, heng te hi a tam thei ang ber min rawn ngaihtuahsak turin a ngen nghal a ni.

World Health Organization (WHO), Country Office for India hotute chuan Mizoram in COVID-19 hripui a dona kawnga theihtawp a chhuahna chu an hriatpui thu leh lawmawm an tih thu lehkha rawn thawnin, Mizoram mipuite tan an ding reng a ni tih an sawi a, COVID-19 hripui leng vanga nunna chante an ui thu leh an chhungte an tawrpui thu pawh ziakin, he hrileng vanga nunna chan an tlem theih nan kawng hrang hrangin theihtawp an chhuah reng tih an rawn ziak a ni.