Latest News

Mizoram-a hri leng laka inkhuahkhirhna Dan khauh lehzuala siam tura rel a ni

Health Minister Dr R. Lalthangliana hova nimin-a COVID-19 inkhuahkhirhna kalpui mek chungchang thlirho-a sawrkar mi pawimawh te thukhawm chuan inkhuahkhirhna Dan khauh lehzuala siam an rel.

Nimin khan Health Minister ho hian Aizawl-a Taxation Auditorium-ah DM&R Minister, Lalchamliana, MOT Chairman Dr. ZR. Thiamsanga leh Chief Secretary, Lalnunmawia Chuaungo bakah COVID-19 dona kawnga hmalatu Department leh pawl hrang hrang aiawhte chuan hri leng meka inkhuahkhirhna chungchang hi an thlirho a, he Meeting hian May ni 3, 2021 zing dar 4:00 thlenga kalpui tur Mizoram puma inkhuahkhirhna dan kalpui mek chu thlirin, COVID-19 laka Zoram mipuite kan him lehzual theih nan inkhuahkhirh hi kalpui chhunzawm tha an tih bakah, inkhuahkhirhna dan pawh tun aia khauh zawka siamthat nise an ti a. State Executive Committee on State Disaster Management-in ruahmanna thar hi an siam dawn a ni.

He thutkhawm ah hian Health Minister chuan tun dinhmunah Oxygen leh Ventilator chungchang ah thlaphanna tur a awm lo tih sawiin, FK Oxygen Plant, Zuangtui ten May thla chhung zawng ZMC-ah Oxygen mamawh ang te a thlawna an refill dawn bakah Delhi Mizote hman tur Oxygen thahnem tak an thawn dawn tih a sawi a. Chief Minister’s Relief Fund-a Zoram mipuite himna tura pawisa thawhtu an pung leh tan chu lawmawm a tih thu sawiin, mi zawng zawngin kan sahimna tur atan hian mawh kan lak ngam theuh a tul takzet a, kan tanrual a ngai lehzual takzet tawh a ni, a ti bawk.

He hunah hian COVID-19 Vaccine chungchang report ngaihthlak niin tun thlengin Mizoram in vaccine dose 2,99,870 a dawng tawh a, nimin khan dose 1,00,000 a rawn thlen belh leh a. Vaccine dose 2,46,478 pekchhuah tawh niin, mi 45,435 in vaccine second dose an la tawh a ni. Sawrkar laipui record danin Mizoram-a kum 45 chin chunglam zinga 54.29% hnenah COVID-19 vaccine hi pek tawh a ni tawh a, India ram-a kum 45 chunglam hnenah pekchhuah zat chu 29.73% a ni thung. 

Sawrkar laipuiin May ni 1, 2021 atanga kum 18-44 inkar vaccine pek tur a tih chungchang ah H&FW Department Special Secretary-in COVISHIELD siam chhuaktu Serum Institute Pvt. Ltd., hnenah kum 18-44 inkar tan vaccine dose nuai 10.22 Mizoramin a mamawh thu a thlen tawh a, hei hi Serum Institute Pvt. Ltd., chuan rawn chhang let tawhin kar 4 chhungin an rawn tihchian theih an inbeisei thu an sawi a. Hetihlai hian sawrkar laipui-a Ministry of Health & Family Welfare hotute chuan vaccine siamtute nen an inbiakrem hnuah Mizoram-a a bultan nan (kum 18-44 tan) COVISHIELD vaccine dose 16,340 lo dah hrang turin an tih thu an rawn sawi a, vaccine man hi Mizoram sawrkarin a pek tur a nih vangin a siamtute nen indawrna kalpui mek a ni.

Comments

Chhiar Hlawhte