Larsap in hri leng chungchang a sawipui

Mizoram Governor, PS. Sreedharan Pillai chuan nimin khan Health Minister Dr. R. Lalthangliana, MKHC hruaitute, Joint NGO hruaitute leh Ex-Services League aiawh kawmin COVID-19 hrileng thawhnihna dona kawnga Mizoram sawrkar hmalakna hrang hrang leh inpuahchahna te a sawipui.

Raj Bhavan Durbar Hall-a he inkawmna ah hian Governor chuan tuna COVID-19 Second wave laka kan himna tura State sawrkar hmalakna tichak tura pawl tangkai leh pawimawh tak tak te nen sawihona neih a tul tawh em avanga Meeting chu koh a ni tih sawiin, kan ram pumpui dinhmun a that loh avangin Vice President leh Prime Minister te chuan Governor te chu State sawrkar hmalakna te a chak zawk theih nan Raj Bhavan te hmang tangkaia a tul anga State mamawh awm thei te hrechianga, Central-a thlen thin tur te, mipui zirtirna kawngah Kohhran leh khawtlang hruaitute nasa zawka thawhpui tura thurawn an pek tel thu a sawi bawk.

COVID-19 First Wave-ah Mizoram chu Kohhran mite leh Tlawmngai pawlte thlawpna bakah mipui thuawihna zarah State him ber pawl kan ni tih sawiin Larsap chuan, tunah hian COVID -19 Second Wave rawn intan leh mekin hrivei pawh a ni telin an pung a. Tun hun hi fimkhurna inzirtir uarna hun a ni a; tuna hmalak thatin rah tha a chhuah dawn a, Mizoram mipuite him leh him loh ah mimal tin ten mawhphurhna kan nei a ni, a ti a. Hrileng laka himna inzirtirna kawngah nasa zawka tan la zual sauh tur leh sawrkar thlawp tlat-a in hawng chhunzawm turin a ngen bawk.

Sawrkarin pawnchhuah khapna thupek a siam te bakah hrileng laka himna tura inkaihhruaina pawimawh chi 3 mithiam ten an sawi - Hmaikawr vuah, midangte hlata awm leh kut silfai uar te chu tun aia tha zawka zawm a tul thu Governor chuan a sawi a. Mi pakhat hri vei in a fimkhur loh chuan ni 30 chhungin mi 406 a kaichhawng thei tih sawiin, hei hian mahni inringhlel leh hrivei te inkhunghran pawimawh zia a ti chiang em em tih a sawi a. Tunah hian mithiam tam takin Covid-19 hrileng chu boruak atanga inkaichhawn theih angin an sawi mek thu pawh sawiin, hei vang hian mitin ten kan him zawkna turin Hmaikawr (Mask) vuah hrim hrim chu kan tihtur a nih thu a sawi baw.

He hunah hian Health Minister, Dr. R. Lalthangliana pawhin COVID-19 dona kawngah Mizoram sawrkar chuan chawl lovin thla 16 chuang zet hma a lak tawh thu leh nasa zawka tan lak sauh sauh a nih thu a sawi a. COVID-19 hrileng dona kawngah Kohhran mipui leh an hruaitute, YMA leh tlawmngai pawl hrang hrangte leh tualchhung leh khawchhunga LC leh VC te chungah sawrkar in a lawm takzet tih a sawi a; sawrkar thlawp chhunzawma, thawpui chhunzawm zel turin a ngen bawk.