Latest News

Mizoram-ah hri kai 73 hmuhchhuah belh leh an ni

Pathianni khan Mizoram-ah Sample 904 enfiah niin heng atang hian COVID-19 hri kai mi 73 hmuhchhuah an ni a, hri kai hmuhchhuah zat hi tlem mah se Sample enfiah zawng zawng atanga chhut chuan zaa 8.07 zet a tling a ni.

Pathianni khan ZMC Laboratory-ah Sample enfiah awm lovin District hrang hranga TrueNat Laboratory-ah Sample 149 enfiah a ni a, heng atang hian hri kai mi 5 hmuhchhuah niin Khawzawl District-ah mi 2 bakah Serchhip, Siaha leh Kolasib District-ah mi pakhat theuh an ni.

Rapid Antigen Test hmangin Pathianni khan Mizoram-ah Sample 755 enfiah niin heng atang hian hri kai 68 hmuhchhuah an ni bawk a, an zinga mi 54 te chu Aizawl District-a hri kai hmuhchhuah niin heng zinga mi 20 te chu hri kaina hriatloh leh chhui ngai an ni. Siaha District-ah hri kai mi 7 hmuh niin Lawngtlai District-ah 4 hmuh an ni a, Serchhip, Kolasib leh Lunglei District-ah hri kai pakhat theuh hmuh an ni bawk.

Hetihlai hian Mizoram-a COVID-19 hri kai hmuhchhuah zingah nunna chan awm lehin nimin zing dar 5:00 khan Lalthianghlimi (68), Aizawl Kanan Veng chu ZMC-ah a boral ve leh a, Lalthianghlimi hian April 21 khan COVID-19 hri a kai tih hmuhchhuah niin April 23-ah ZMC-ah hian dahluh a ni a, April 25 atangin ICU-ah dah niin nimin zing khan a boral zui ta a ni. Nimin vek chawhma dar 10:30 khan Thangluaia (58), Bawngkawn chu ZMC-ah a boral ve leh bawk a, Thangluaia hi April 26 khan Lengpui Airport Screening Point-ah hri a kai tih hmuhchhuah niin ZMC-ah admit nghal a ni a, amah hi Rilpui Cancer niin Chuap-a darh tawh a ni bawk.

Nimin khan Mizoram-a COVID-19 hri kai mi 165 te chu enkawl dam an ni ve leh bawk a, heti hian nimin tlai dar 5:00 thlenga Mizoram a hri kai hmuhchhuah chu 7623 niin heng atang hian mi 5920 te chu enkawl dam an ni tawh a, hei hi hri kai hmuhchhuah atangin za zela 77.65 niin tunah hian hri kai enkawllai 1681 an la awm a, hri kai zingah nunna chan mi 22 an awm tawh bawk a ni.

Mizoram-a District hrang hrang 11 zingah Hnahthial District tihloh District dang zawngah chuan COVID-19 hri kai enkawllai hi an awm vek a, Aizawl District chu hri kai enkawllai tamna ber niin mi 1154 enkawl mek an ni a, Serchhip District in dawtin mi 145 enkawl mek an ni a, Kolasib District-ah mi 88 enkawl mek an ni bawk. Heng bakah hian Lunglei District-ah hri kai mi 82 enkawl mek la awmin Siaha District-ah mi 58 enkawl mek an ni a, Mamit District-ah mi 53 la enkawl niin Lawngtlai District-ah mi 43, Saitual District-ah mi 30, Khawzawl District-ah 19 leh Champhai District-ah 7 enkawl mek an ni.

Comments

Chhiar Hlawhte