Latest News

Chanchin thar thenkhat :

Intlawhpawh vanga hri kai tam

Kolasib District Bawrhsap, Dr. H. Lalthlang-liana chuan Kolasib District chhung atanga CO-VID-19 hri kai zingah thenawm khaw veng intlawh-pawhna atanga hri kai an tam ber thu a sawi. Nimin-a Kolasib District MJA ten inkhuah-khirhna kalpui chhunzawm dan tur chungchanga a Pisa-a an kawmna ah he thu hi sawiin Kolasib District Bawrhsap chuan inkhuahkhirna thupek awmsa chhunzawmna a nih angin mipuite chi-ai lo tur a a duh thu a sawi a, Kolasib khaw chhung a hri kai te ngun tak a zirchian an nih hnuah a tam ber chu thenawm khawveng inlen pawh nasat vang nia a lan thu a sawi a, “Mahni veng theuh ah thenawm khaw veng intlawhpawh lo tura kan inkhap theih chuan hri dona tura kan hmalakna hi a sawt phah hle ang,” a ti. Nimin thleng khan an District-a COVID-19 hri kai te chu sawrkar Covid Care Centre-a enkawl vek an la nih thu DC chuan sawiin, Kolasib District khaw dangah pawh a tul dan a zirin CCC hi ruahman a nih tur thu a sawi bawk.


Lunglei-ah khawl dah belh

Lunglei Civil Hospital TrueNat Laboratory-a hman tur Molbio TrueLab Uno Dx khawl pakhat chu nimin khan Aizawl atangin Lunglei-ah phurh thlen a ni a, Lunglei Medical Superintendent Dr. SR. Ngurchamliana chuan khawl hi Laboratory-a dahluha hman nghal anih tur thu a sawi. Heti hian tun dinhmunah Lunglei Civil Hospital TrueNat Laboratory-ah Truenat Quattro khawl (vawi khata sample pali test thei) pakhat leh Molbio TrueLab Uno Dx (vawi khata sample pakhat test thei) khawl pakhat a awm a ni.


CMRF-ah vbc. 22 lut tawh

Nimin thleng khan COVID-19 laka mipui himna tura a tul apianga hman turin mimal, pawl leh Kohhran atangin Chief Minister's Relief Fund for COVID-19 ah Rs. 22,94,29,954/- a lut tawh a, heng atang hian Rs. 21,33,60,970/- chu hman ni tawhin nimin thleng khan tanpuina sum leh pai chhungkut hi an la awm a ni.


Hnahthial-ah thutkhawm nei

Nimin khan Hnahthial District chhunga CO-VID-19 dona kawnga hmalatu District Level Task Force leh Village Level Task Force te chu DC Office Conference Hall-ah District Bawrh-sap, H. Dolianbuaia hovin an thukhawm a, he hunah hian an hmalak tawhna hrang hrang thlirin lockdown kalpui avanga chhuanchham leh harsa zual an awm lohna atan mahni huamchhung theuh ngaihven tura inchah a ni bawk. He thutkhawm ah hian lirthei-ah 'On Covid-19 duty' tih intara duty paltlang tum thin an awm thu leh ngaimawhawm an tih thu tarlan niin heng lirthei te hi endik nise an ti bawk.


India zalenna ni pualin Online Seminar neih a ni

Sawrkar laipui ruahmanna anga India Independence Day vawi 75-na lawmna, ‘Azaadi Ka Amrut Mahotsav India at 75’ hman mek pualin nimin khan Art & Culture Department leh Higher & Technical Education Department-te buatsaih ‘Online Seminar on First War of Independence 1857’ chu ZOOM hmanga neih a ni a. He seminar hi Govt. Aizawl College-in a thleng (host) a, mithiam hrang hrangte thuziak chu he hunah hian zirho a ni.

Comments

Chhiar Hlawhte