Latest News

Hripui leng kara zirna kalpui zel dan tur sawiho

School Education Minister, Lalchhandama Ralte hovin nimin khan School Education Department Officer-ten Google meeting an nei a, he hunah hian hripui leng kara zirna kalpui dan tur leh a kaihhnawih te sawiho a ni.

He meeting-ah hian hripui leng mek avangin Class pangngai neih theih a nih loh dan te, a theih ang anga Online class kalpui tura hriattirna Department-in a chhuah tawh thu leh School engemawzat chuan Online Class hi an kalpui leh tawh tih tarlan a ni a. Hetihlai hian Online Class hi School tam tak tan neih theih a ni lova, chuvangin nikum lama lo tih tawh angin Secondary School tan MBSE in Weekwise Plan an siam leh Elementary School tan SCERT in Alternative Academic Calendar an siam chu hman leh tum a ni a. Hripui avangin lockdown hi awm zel mahse, Weekwise Plan leh Alternative Calendar siam sa hmang hian engemawchen kalpui theih beisei a ni bawk. Online class neih dan phung chu bihchian deuh tul nia hriat a ni a, Directorate, School Education-in monitoring lo tih nise tih a ni bawk.

Meeting-ah hian Private School ten School Class pangngai kalpui theih loh lai pawha zirtirtu hlawh leh thildangah senso a san tho avangte, Online a zirtirna an kalpui tho avangte in Tuition Fee a full-a lak theih an duh thu Department-a an thlen chu ngaihtuah a ni bawk a. Hemi chungchang ah hian a kaihhnawih Zirlai pawl, Zirtirtu pawl leh Department Officer-te chu May 25,2021 chawhma dar 11:00-ah inrawnkhawm nise tia thutlukna siam a ni.

Primary atanga Higher Secondary School thlenga Headmaster leh Principal neih loh avanga School ten harsatna an tawh sutkian nan Headmaster post ruak fill-up dan tur kawng dap zel a nih thu pawh tarlan niin, Primary School Headmaster promotion-a hnawh khah tur post 150 chuang atan ACR khawn mek a nih thu leh post 120 chuang chu Limited Departmental Exam (LDE) hmanga hnawhkhah turin SSSB ah thawn tawh anih thu te, Middle School Headmaster post 113 promotion-a hnawhkhat turin ACR khawn mek a nih thu leh LDE a hnawhkhah tur pawh MPSC-ah thawn a nih thu te sawi a ni a. High School Headmaster post ruak te leh Higher Secondary Principal post ruak hnawhkhah tur pawh buaipui anih thu te sawi a ni bawk.

Meeting-ah hian MBSE-in HSLC leh HSSLC result chu tluang taka buatsaih zel a nih thu te, a hmawr bawk fel tep a nih thu leh India ramah result tichhuak hmasa pawl an ni thei dawna hriat a nih thu te an report a. Covid-19 hri kai avanga Exam chhunzawm thei ta lo te chu Supplementary Exam ruala exam ve tura an ruahman thu MBSE hotute chuan Meeting-ah hian an sawi bawk a ni.

Comments

Chhiar Hlawhte