Hualtu VLTF te dan pangngaiin ding zui dawn

Serchhip District chhunga Hualtu VLTF te chuan VLTF atanga an ban thu bialtu MLA leh Assembly Deputy Speaker hnenah ziakin an thlen a, nimin khan District thuneitute nen inbiakna neiin VLTF hi ding chhunzawm leh tura tih a ni.

Hualtu VLTF ten VLTF atanga an ban thu bialtu MLA hnena an thlen ah hian COVID-19 hripui leng mek lak a an khawtlang a him theih nan a an ruahmanna leh hmalakna te District thuneitu ten an pawmpui theihloh bakah ni 100 inhlawhna, MGNREGS thlenga tihtawp sak tur hial a an vau avangin May 25, 2021 zan dar 11:00 atangin an chawl ta tih an sawi a ni.

Hetianga hma an lak chhan LENKAWL zawhna chhangin Hualtu VCP, Lalrinmawia chuan an Veng ah hian Quarry tam tak a awm thu sawiin, an khua in Lung te an phurh bakah Chhing-chhip atang te pawhin an phurh thin thu a sawi a. An khaw thenawm ah hri a tam avangin Lock-down chhung hian an khua pawhin phurchhuak rihlo turin VLTF ten an tih hnuah DC in lung phur turin m-pass alo pe nia sawiin, hetianga lung an phur ta mai hi mipui lam ten an duhlo niin a sawi a. Hemi chungchang hi DC an sawipui hnuah DC chuan SOP ang bak chuan a kal theihloh thu leh SOP anga kal tura a tih thu an sawi a. Hemi chungchangah hian niminpiah lamah inbiakna an neih thu pawh sawiin, he inbiakna ah hian an lawm loh avangin hetiang hian hma an la ta tih a sawi a ni.

Hetianga boruak a awm hnu nimin khan Serchhip atangin Addl. DC, Lalmuansanga Ralte leh SDO (Sadar), C. Laltleipuii bakah sawrkar mi pawimawh thenkhat te chu Hualtu-ah hian kalin VLTF hruaitute nen inbiakna an nei a, he hunah hian harsatna awm te sawihona an neih hnuah Quarry-a lung phurh hi phal sak tawh rihlo tura inremna siamin VLTF te pawh hi ding chhunzawm leh tura an tih thu Hualtu VCP chuan a sawi bawk.