Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

COVID-19 hri a len denchhena Dawrkai te an bungraw zawrh te tih to lo turin ngen

Serchhip District Consumers Association (SDCA) chuan dawrkai te chu COVID-19 hri a len denchhena an bungraw zawrh te tih to phah lo turin an ngen.

Hemi chungchanga thuchhuah an siamah Serchhip District Consumers Association chuan COVID-19 hripuiin kan nunphung a tih khaihlak laiin Consumer ten kan chanvo kan chan zui zel theih nan sawrkar chuan ruahmanna a siam reng thu leh thil lei leh hralh chungchangah pawh mipui ten harsatna kan tawh loh nan Mizoram sawrkar chuan ruahmanna a siamin sumdawng te pawhin an bungraw lakluh leh hralh kawngah harsatna an tawh loh nan ruahmanna felfai tak a siamsak bawk tih an sawi a. Hetianga sawrkar hmalakna chu lawmawm an tih thu sawiin, hemi avang hian thil lei leh hralh chungchangah pawh harsatna lutuk a awmlo nia an hriat thu an sawi a, Bungraw lakluh leh phurhkualna kawngah pawh mipui mamawhna hriaa sawrkarin ruahmanna a siam avangin COVID-19 hri a len denchhena kan bungraw zawrh te tih to phah lo turin dawrkar te chu an ngen a ni.

Maximum Retail Price (MRP) aia to a thil hralh chu dan kalh a nih thu pawh sawiin Serchhip District Consumers Association chuan dawrkar zawng zawng te chu an bungrua te MRP aia sang a zuar lo tur leh mipuite pawh MRP aia sanga dawra thil leilo turin an ngen a. MRP aia sanga thil zuar emaw, lei emaw an awm anih chuan District Consumer hruaitute hnenah emaw, Legal Metrology te hnenah emaw a rang lama report thin turin an ngen a. Serchhip khawpui chhunga dawrkai ten MRP aia sanga thil an zawrh leh zawrhloh chu a tul angin an enzui thin dawn tih an sawi bawk.

Hetihlai hian kumin February thla a Serchhip-a Khawnvartui rawn thleng a tlinglo nia hriat a nih hnuah nimin khan Retailer ten Khawnvartui an sem tur chu rawn thleng lehin Legal Metrology Enforcement Staff leh SDCA te chuan an enfiah a, Retailer tin hian an chan tur litre 4000 theuh an dawng nia thudawn niin, hei hi tunhma lama Khawnvartui hralh then ang kha a awm tak loh vanga an ngaih thu SDCA hruaitute chuan an sawi a ni.

Comments

Chhiar Hlawhte