Latest News

Kum 2020-2021 chhungin Mizofed Serchhip-ah eirawngbawlna Gas a thleng tha thawkhat

Sawrkar kum kalta April 2020 atanga March, 2021 chhung khan MIZOFED Serchhip Branch ah eirawngbawlna Gas Truck Trip 188 rawn thlengin mipui ten eirawngbawlna Gas-ah harsatna liantham an tawklo niin a lang.


MIZOFED Serchhip Branch atanga thu kan dawn danin an hnuaiah hian tun dinhmun ah Gas Consumers 12,000 vel awm mekin heng mite hian hnianghnar taka eirawngbawlna Gas an dawn theihna tur chuan thla tlin Trip 15-16 vel tal an dawn a ngai a, nikum chhung khan thla tin thleng tling lo mah se Gas hi a rawn thleng tha thawkhat tih sawiin, mipuite pawhin harsatna liantham an tawklo nia an hriat thu an sawi. Kum kalta chhung khan Serchhip-ah hian eirawngbawlna Gas Truck Trip 188 rawn phurhthlen niin hetah hian kg. 14.2 a rit eirawngbawlna Gas bur 54,451 rawn thlengin kg. 19-a rit Commercial Cylinder bur 1176 a rawn thleng bawk a, hei bakah hian kg. 5-a rit Gas bur tlem rawn thleng a awm bawk a, heng te hi Serchhip bakah a chhehvel-a Consumer an neihna khua ah te semchhuah thin a ni.

Eirawngbawlna Gas rawn phurtu Truck te hian an phurh zat a inan loh thu pawh sawiin MIZOFED-a thawktute chuan nikum chhunga a trip-a Gas rawn thlen tam ber thla chu December niin Trip 20 a rawn thlen thu an sawi a, Gas bur rawn thlen tam ber thla erawh June thla niin hemi thla hian Trip 19 rawn thlengin Domestic Cylinder 5976 leh Commercial Cylinder 168, a vaiin bur 6144 a rawn thlen thu an sawi a. Gas rawn thlen tlem ber tum chu nikum August thla kha niin hemi thla hian Truck Trip 10 rawn thlengin Domestic Cylinder 2988 leh Commercial Cylinder 60, a vaiin bur 3048 a rawn thleng bawk a ni.

Gas rawn thleng te hi mipuite hnen semchhuah a nih hmain Legal Metrology Enforcement Staff te chuan a buk a tlin leh tlinloh an enfiah hmasa thin a, nikum April thla atanga kumin March thla tawp thleng khan heng Gas an enfiahna ah hian a buk tlinglo bur 323 manchhuah a awm bawk a, heng Gas tih chingpen an man te hi dan anga chawitirin thawnlet thin a ni.

Comments

Chhiar Hlawhte