Harsatna te sawifiah turin Chief Minister phut

ZPM Legislature Party chuan Chief Minister, Zoramthanga chu mipuite hnena thuchah siama kan harsatna te sawifiah tura an phut thu an sawi.

Nimin-a thuchhuah an siamah ZPM Legislature Party chuan COVID-19 hripuiin a vawi hnihna atan min han run leh takah sawrkar-in hma a lakna hrang hrangte chu an thlawpin puih an ngaihna ah chuan an inpeih reng tih an sawi a. Chutihrual chuan Chief Minister in sawrkar sum dinhmun mipuite hrilhhriatna a nei ta miah lo leh a duhna lama sum seng thei reng chunga sawrkar hnathawkte hnena vehbur a khawn ta mai chu ram hruaitu awm dan tur a nih loh avangin kan tanrualna a that zawk nan leh Chief Minister’s Relief Fund (CMRF) a pawisa pe duhte tan pawha rilru dam taka an pek theihna turin, Chief Minister leh Finance Minister a nih angin State mipuite hnena thuchah siam a, kan harsatna te sawifiah turin Zoramthanga chu an phut thu an sawi a ni.

Hei bakah hian kum 2021-22 budget-a SEDP atan cheng nuai 40,000 dah te chu COVID-19 avanga ei leh in lama harsatna tawkte, kan ral hmatawng- VLTF/LLTF te tanpuina atana hmang tur leh Mizoram State Health Care Scheme sum bawm-a cheng nuai 20,000 chuang la awm chu COVID-19 vei ten a thlawna inenkawlna an dawn theih nan a hmang turin an ngen a. “Mahni duhsak zawngte tana hna siam sak hi ti tawpin, mipuite tana luangchhuak zawk tawh turin kan CM hi kan beiseiin kan phut tlat a. Kan sum hman danah hian tuna kan mamawh ngawih ngawih leh kan la dahthat theih hrih tur hi thliar a hun kan ti tawh hle,” an ti bawk.

ZLP chuan COVID-19 avang hian harsatna tam tak la hmachhawn thei kan ni tih hre reng chungin MLA Fund atanga a sum hlawma (cash) LLTF/VLTF te leh mipui harsatna tawkte tanpui theih dan tur ngaihtuahpui tura ngen bawkin, “Kum 2021-22 chhunga kan budget hi hman a nih hma hauhvin hripui dona atana pawhpen a ngaih leh tak avangin, a nihna tur taka hman anih theih nan Assembly Session kovin Budget Re-appropriation (Siam thatna) neih ni rawh se,” an ti bawk.