Latest News

Mizoram-a kum 18 leh 44 inkar te hnenah Covid Vaccine a thlawna pek an ni dawn

Health Minister Dr. R. Lalthangliana chuan Chief Minister, Zoramthanga’n Zoram mipuite kan himna a ngai pawimawh tih sawiin, kum 18-44 inkarte hnenah a thlawna COVID Vaccine pek a phalsak thu leh kum 18-44 inkar mi nuai 5 bawr vel kan neih thu a sawi.

Taiwan sawrkar leh Meihu University, Taiwan in Oxygen Concentrator leh Cylinder 15 ve ve Mizioram sawrkar a rawn pek Mizoram mipui aiawha nimin-a a lo dawnna hunah he thu hi sawiin Health Minister, Dr. R. Lalthangliana chuan Mizoram-ah kum 18 leh 44 inkar vaccine pek ngai mi nuai 5 vel kan nei tih sawiin, heng mite hian Vaccine Dose hnih theuh an lak a ngaih avangin Vaccine hi dose nuai 10 bawr vel lei kan ngai dawn tih a sawi a. Hemi atan hian cheng vbc. 30 chuang zet sen a ngai dawn a ni, a ti a. Vaccine lei tur hian a siamchhuaktute hnen atangin Order siam fel tawh a nih thu sawiin Health Minister chuan, India ram pumah demand a san avangin a siamtu ten an supply hneh lo deuh a, vaccine kan dawn theih hun tur a la hriat rih loh avangin kan nghah a la ngai deuh dawn a ni, a ti a, Vaccine hi a thlawna pek Chief Minister a phalsak thu a sawi a ni.

Chief Minister hian Ventilator tha chi 35 zet lei a remtih thu pawh sawiin Health Minister chuan, nikum khan PM Cares hnuaiah Ventilator 100 chuang kan dawn thu leh, Private Hospital te pawh an sem hial tih a sawi a, amaherawhchu COVID-19 hrik hian Chuap a khawih chhiat nasat thin avangin Oxygen 100% a an kal tir pawhin COVID-19 vei damlote Oxygen mamawh a pump zo lo thin a, Ventilator tha chi 35 lai kan neih belh tur chuan thla a ti muang sawt tih a sawi bawk.

Taiwan atanga Oxygen Concentrator rawn thleng hi Jonathan Lalremruata, India-Formosa Foundation Chairman in Health Minister kutah hian a hlan a, Ireland sawrkarin Oxygen concentrator 500 chu India ram a rawn pek thu leh chumi atanga sawrkar laipuiin Mizoram tana 60 a rawn pek chu a rawn thlen tawh thu Health Minister hian a sawi bawk a ni.

Nimin a heng bungrua dawnsawnna hun ah hian Lok Sabha MP, C. Lalrosanga leh Addl. Chief Secretary, JC. Ramthanga te pawhin Chief Minister hmalakna bawhzuia India rama Taiwan Ambassdor kaltlanga Taiwan sawrkar an dawr dan leh hma an lakna te sawiin, hemi kawnga hmalatute chungah lawmthu an sawi bawk.

Comments

Chhiar Hlawhte