Latest News

COVID-19 Second Wave chungchangah Chief Minister in mipuite hnenah thuchah a tichhuak

Chief Minister Zoramthanga chuan kan sawrkar in sum thu a harsatna a tawh te chu mipui ten an hriatpui tha a tih thu a sawi.

COVID-19 Second Wave chungchanga Zoram mipui hnena thuchah nimin-a a tihchhuah ah Chief Minister chuan, “Budget-ah nikum leh kum hmasa lam ami en chungin 'kumin chu heti zat hi kan hmu thei ang chu maw' kan tih, Budget Estimate (rinthu) a ni a budget chu. Kan han pharh a, 'heti zat hi hman theih turin han pass phawt ang' tiin kan pass a. Khami kha a pangngai ah chuan a sual tam ngailo thin,” a ti a. Amaherawh chu COVID lo thlen chinah chuan khawvel pumpui, India ram, Mizoram a buai ta vek tih sawiin, “Nikum kalta kum 2020-21 budget a kan hmuh tura kan ngaih, kan pass hnan ah khan sawrkar laipuiin a tum ang sum an lakkhawm theihloh avangin kan hmuh tura kan dah atangin cheng vbc. sang leh zanga vel kan hmuh tak loh phah a ni,” a ti.

Kumin Financial Year thar te ah hian World Bank hun tawp nen a lo innang tih sawiin Chief Minister chuan, “Khata kan State in kan tum let ve na, kan pek ngei ngei tur kha vbc. sawmsarih a hlawmpui a pekchhuah a ngai a. Chu mai bakah chuan tun hma kum sawm kalta a Mizoram State in a leiba eng eng emaw tlingkhawm a neih, pek ngei ngei ngai ta vbc. 150 kan pek ngai a awm a, kan pe leh ta bawk a ni,” a ti a. “Development chu sawiloh, kan tui leh kan Electric, kan kawng thalo siam ngei ngei ngai te, Covid kan dona te, chung zawng zawng bakah sawrkar hnathawk hlawh te kan la pe thei zel hi a lawmawm takzet a, Pathian puihna kan dawng a ni,” a ti a. “Development tur hi chu sum chu tih ngaihna a awmlo a, amaherawhchu central atangin tawp ringawt lovin kawng laihna tur/In sakna tur/mipui inkhawlhfakna tur hrang hrang tuk lawk rawn pek an nei a. Chung sum an rawn pek chu an rawn pek chhan ah chiah bak chuan thil dangah chuan a hman theihloh a ni,” tiin kan State sum chhungah chuan In thar pawimawh zual sakna tur, kawng thar laihna tur thar te chu a tih hleihtheih rihloh tih a sawi bawk.

Chief Minister chuan COVID-19 hri leng dona kawng hrang hrang thawktute inpekna ropui a tih thu leh lawmawm a tih thu sawiin, COVID Fund atana CM Relief Fund-a sum thawhtute zawng zawng chungah lawmthu a sawi a. Kan harsatna tawh karah hian mipui ten hriatthiamna thui tak neiin, phun pawh phun lovin tan kan la tlang vek chu lawmawm a tih thu sawiin, “Pathian tanpuina chauh lo chuan he hri do hi tih theih a nilo a. Pathian hnenah he hripui laka kan himna tur hmanrua kan neih theih nan dil ila. Pathian in kan hnenah sawi duh enge a neih tih hriat tumin kan beng chhi ila. Keimahni tan, ram dang tan, khawvel tan tawngtaiin hma i la ang u,” tiin mipuite chu a chah bawk a ni.

Comments

Chhiar Hlawhte