Chanchin thar thenkhat :

Larsap in chawimawina hlan

Mizoram Governor, PS. Sreedharan Pillai chuan Mizoram-a kum 4 an awm chhunga hna tha tak tak an thawh avang leh an hlawhtlinna avangin 46 Assam Rifles te hnenah nimin khan chawimawina thuziak chu Raj Bhavan-ah a hlan a, he thuziak-ah hian 46 AR-te chuan Saitual Mamit, Kolasib, Champhai leh Aizawl District-ah mipui rawngbawl hna tha takin an thawh thu leh ramri hrulah ram venhim hna tha taka an thawh avanga chawimawi an phu zia te pawh a in ziak tel bawk a ni. 46 Assam Rifles te hi April 17, 2017 khan Mizoram-ah an rawn awm tan a, kumin May 28 hian an awm hun tawpin Battalion dangin an thlak dawn a ni.

Mamit damdawi In in dawng

National Health Mission (NHM) Mizoram Mission Director, Dr. Eric Zomawia chuan National Health Mission hnuaia State Quality Assurance Programme bultuma Labour Room (Nau neihna room) ti changtlung tura hmalakna, ‘LaQshya Initiative’ kal zelah Mamit District Hospital Nau neihna Room chu India rama Labour Room tha, LaQshya Certificate pek a nih thu a sawi a. Mamit District Hospital Labour Room hi March ni 30, 2021 khan National Level Virtual Assessment neih a nih thu sawiin, he endikna ah hian LaQshya Checklist hmangin endik a ni a, thawktute thiamna leh hawihhawmna, faina, bawlhlawh sawngbawl leh natna darh tur venna kawnga hmalakna te endik a nih thu leh zaa 93 an hmuh thu a sawi bawk.

MLA in TrueNat khawl hlan

Kolasib bialtu MLA leh Supply Minister, K. Lalrinliana chuan COVID-19 vei leh vei loh endikna khawl, Truelab Quattro chu MLA-LADS Fund hmanga leiin nimin khan Kolasib District Hospital-a District Medical Superintendent, Dr. Doris Lalnunmawii Sailo hnenah a hlan a, Khawl thar bakah hian Test kit 400 pawh hlan nghal a ni. Truelab Quattro khawl hian vawi khatah sample pali a endik thei a ni.

MLA in tanpuina hlan

Kolasib bialtu MLA, K. Lalrinliana chuan nimin khan Kolasib khaw chhunga lirtheia eizawng Maxi Cab, Auto Rickshaw leh Taxi Driver Association te hnenah COVID-19 hrileng avanga eizawnna kawnga harsatna tawkte tanpui nan sum fai Rs. 30,000/- theuh a hlan a. MJA Kolasib te pawh hun engemaw chen chanchinbu an buatsaih theilo chu pawi a tih thu sawiin, Rs. 50,000/- a hlan bawk.

A nawlpui hri danna pe tan

Mizoram-ah kum 18-44 inkar mi nawlpui tan COVID-19 hri danna pek chhuah tan a ni. COVID-19 hri danna la thei turte'n Online kaltlanga hming an ziahluh hnuah, nimin atang khan kum 18-44 inkar mi nawlpui tan hri danna hi harsatna awm lova pekchhuah a ni a. Aizawl ah chuan DEIC, Tlangnuam YMA Hall, Tuikual Presbyterian Hall leh Ramhlun Vengchhak-ah te hri danna hi pekchhuah a ni a, nimin khan kum 18-44 inkar mi nawlpui tana hri danna hi pek-chhuah tan ni mah se, Vawiin lamah hri danna hi kawlsa a zo dawn niin Dr. Lalzawmi, State Immunization Officer chuan a sawi.

Dr. Lalzawmi chuan Vaccine khaihlak tur thu hi sawiin, sawrkar laipuiin a thlawna a rawn thawn ho nen khan hmanpawlh awih a nih loh thu a sawi a. June 11, 2021 hi COVID-19 hri danna lo thlen hun turin an rawn ruahman a nih thu leh thuneitute zuk tur thiam dan te leh vaccine indaih dan te a zirin an rawn thawn hma thei tho niin a sawi a, a hmunpui lam zawkin an rawn thawn hman loh palh thuta an intlawhkhalh lawk nan June 11 hi an rawn thawn theih tura an hun ruat a nih thu a sawi a ni.

CM in thuchah tichhuak

COVID-19 Second Wave chungchangah Chief Minister, Zoramthanga chuan nimin khan thuchah tichhuakin COVID-19 hri leng dona kawng hrang hrang thawktute inpekna ropui a tih thu leh lawmawm a tih thu a sawi a. COVID Fund atana CM Relief Fund-a sum thawhtute zawng zawng chungah lawmthu sawiin, sawrkar in sum thu a harsatna an tawhte an hriatpui tha a tih thu a sawi a, “Nikum kalta kum 2020-21 budget a kan hmuh tura kan ngaih, kan pass hnan ah khan sawrkar laipuiin a tum ang sum an lakkhawm theihloh avangin kan hmuh tura kan dah atangin cheng vbc. sang leh zanga vel kan hmuh tak loh phah a ni,” a ti. Chief Minister chuan Pathian tanpuina chauh lo chuan he hri do hi tih theih a nilo tih a sawi bawk.

Congress leh ZPM in ngen

Congress Thalai leh ZPM Thalaite chuan nimin khan thuchhuah siamin hrileng thawh hnihna avanga  hun rei tak chhûng chu hnathawk thei lova mipui kan awm avangin eichawp zawng a bikin, Commercial Vehicle hmanga eizawng chhungkuate'n inkharkhip hi an tuar nasa em em tih an sawi a, heng mite ngaihven tur leh an tana ruahmanna siam turin sawrkar an ngen bawk.

MLA in Sairang Joint VC te Ambulance a hlan

Aizawl West-I bialtu MLA, Zothantluanga chuan a bial chhunga AMC Area pawnlam-a khaw pathum- Sairang, Sairang Dinthar leh Sih-hmui khawtlang mipuite tan Sairang Joint VC te hnenah Ambulance a hlan a, Ambulance hlanna hun hi nimin khan Sairang Police Station tual-ah neih niin Ambulance Driver hak tur PPE Set 7 leh Oxygen Concentrator chu a hlan nghal bawk. He hunah hian Sairang Joint VC Chairman, VL. Chhanhima chuan lawmthu sawiin, mipui ten tangkai taka an hman ngei dawn thu a sawi bawk.

Midangte tan penchhuak

Tunhnaia COVID-19 hri leng avanga har-satna nasa tak tawk, Thenzawl khuaa eizawnna atana lirthei hmanga tui chawi thin te chuan nimin khan tui leina nei remchang lo tan a thlawnin tui an chawi sakin an sem a, he hunah hian Pik-up pahnih leh Truck paruk, an vaiin lirthei pariat thawkchhuakin Thenzawl Town Task Force Chairman Lalropuia Sailo chuan, mahni insengso a, lirthei neitute midang tanpui tura an thawk chhuak chu lawmawm leh ropui a tih thu a sawi.

Keitum VLTF te pawhin thuchhuah siamin an khua in hri avanga harsatna an tawh laiin sum leh pai bakah thilpek chi hrang hrang an dawng tih sawiin, lawmthu an sawi a. Keitum khua ah hian hri kai mi 28 hmuh ni tawhin In lama inkhung-hrang chhungkaw 100 vel an la awm a ni.