Buhfai sem tur ruahman tawh

Serchhip DCSO chuan sawrkar laipui ruahman anga PMG-KAY hnuaia a thlawna buhfai sem tur atan ruahmanna an siam fel tawh thu a sawi.

Sawrkar laipui in May leh June thla-a PMG-KAY hnuaia a thlawna buhfai sem a tum chung-changah hian Serchhip DCSO, C. Zadailova chuan April 20, 2021 hma lama Ration Card nei te a huam dawn thu sawiin, AAY hnuaia Ration Card nei leh PHH Ration Card nei te hnenah buhfai hi a thlawna sem tur a nih thu a sawi a, a thlawna May thla-a ration buhfai sem tur hi May thla a Ration buhfai sem tur pangngai ruala pek-chhuah a nih dawn thu a sawi bawk.

Serchhip-a Supply Department-a thawktute hnen atanga thu kan dawn danin tunah hian AAY Ration Card nei te hi Ration buhfai hi thlatin Kg. 35 chu kg. khat zelah Rs. 3/- hisap-a leiin hei bakah hian mi pakhat in May thla ah hian kg. 5 zel a thlawnin an dawng thei dawn a. PHH Ration Card nei te hian mi pakhat tan kg. ah Rs. 3 hisapin kg. 5 zel leiin mi pakhat ah kg. 5 zel a thlawnin an dawng dawn bawk a, Rs. 15/- hisap-a kg. 5 an lak thin erawh a awm dawnlo thung tih an sawi a, hetianga buhfai sem tur hian engkim ruahman fel a ni tawh a ni.