ZPM Leader in finfiahna neih te phawrh turin phut

ZPM Leader, Lalduhoma chuan tunhnaiah ‘ZPM chuan Kohhran hi kan Unit a ni,’ ti an awm nia sawiin, hetiang thu an sawi finfiahna nei te chu phawrh tura an phut thu a sawi.

Aizawl Municipal Corporation (AMC) inthlanna neih tura Ward No 19-a Campaign hawnna hun nizan hmasa-a neih a hmanpuina ah he thu hi sawiin ZPM Leader, Lalduhoma chuan tunhnaiah AMC-a an elpui ber tur MNF ten nasa takin anmahni chu an bei nia sawiin, “An hotute hmun hrang hrangah kalkualin ZPM leh keima mimal beih chu hna berah an neih a. Kan ngawi reng a, kan dawh zel a; tunhnaiah ‘ZPM chuan Kohhran hi kan Unit a ni an ti,’ tiin an kalna hmun hrang hrangah an sawi leh a, kan Vice President Pu Sapa’n a sawifiah hnuah pawh duhtawk mai lovin an la sawi lui ngar ngar,” a ti a. Vawiin thlenga an hotupa berin a sawi leh takah chuan, hetiang thu hi khawiah nge an sawi tih tih zawtin, “A finfiahna kan sawi leh ziakte a nei a nih chuan rawn phawrh turin ka phut a, a nei lo a nih chuan tunhnuah sawi tawh lo turin ka chah duh a ni,” a ti bawk.

Lalduhoma chuan MNF campaign auhla ber, State a rorellai te thawhpui theih tur AMC sawrkar siam a ngaih thu chu mipui bum tumna a nih thu pawh sawiin, “AMC hi Direct Funding, Delhi tlang aTanga budget an rawn siamsak vek, mahni-a inrelbawl liau liau a ni a. Heti laia ruling leh ling lo hian awmzia a nei lo,” a ti a. “AMC sum lokal hi sawrkarah a rawn thleng a. Sawrkar chuan AMC kuta lo hlanchhawn kha a lo tih ve mai tur a ni. Ni rei tak kawldin sak theihna pawh a nei lova, huntiam awmsa vek a ni. Huntiam chhunga AMC kuta a hlan loh chuan nitin a pung a awm a, a tawpah a pung te nen vek a pek leh tho tho a ngai Thin,” a ti bawk.