Vawiin-ah Assembly thutkhawm nei tan dawn
Mizoram Legislative Assembly Budget Session chu Vawiin hian neih tan a ni dawn a, March 17 thleng thutkhawm neih a ni ang.
Ni 23 chhung awh tur Mizoram Legislative Assembly thutkhawm tan ni, Vawiin ah hian Mizoram Governor, P.S. Sreedharan Pillai chuan House-ah thu a sawi anga, naktuk-ah thutkhawm hmasa leh tun thutkhawm inkar-a ram hruaitu thi te sunna hun hman a nih dawn bakah Governor thusawi chungchanga lawmthu sawina Motion chu sawiho tur a ni ang.Ruahman lawk ang chuan March 1 khian Finance Department changtu Chief Minister, Zoramthanga chuan sawrkar kum thar lo awm tur, kum 2021-22 chhunga Mizoram Budget tura ruahman chu a pharh anga, March 3 atanga 8 thleng Member ten sawihona neiin March 9 atangin Minister ten an Department enkawlna tura sum an ruahman chu sawiho leh a ni dawn bawk a, March 17-ah thutkhawm hi zofel tura ruahman a ni bawk.
Tun tum Assembly thutkhawm ah hian House chhunga chhan hi zawhna (starred question) 380, ziaka chhan chi zawhna (unstarred question) 189 lut a awm tawh a, Sawrkar Bill lut pathum bakah Private Resolution 77 a lut tawh bawk. Session neih tur avang hian nimin khan MLA zawng zawngte chu Rapid Antigen Test hmangin an Sample enfiah sak vek an ni bawk.
Comments
Post a Comment