Latest News

Aizawl-ah National Deworming Day (NDD) hmang

National Deworming Day (NDD) chu nimin khan rampumah hman niin Aizawl-ah pawh School Education Department-a Commissioner & Secretary, Esther Lal Ruatkimi hovin hman a ni.

Govt. KM H/S-a he hun hmanna ah hian Esther Lal Ruatkimi chuan India sawrkarin hriselna kawngah nasa takin hma a la mek a, heng hmalakna zingah hian naupang kum khat leh tleirawl kum 19 inkar te an lo hriselna zawk tur atan a huho a Rulhut Hlo (Albendazole) eitir hi a ngai pawimawh em em a; he hun pawimawh tak hi February 2016 atangin kumtin la hman ziah a ni, a ti a. Kumdangah chuan NDD chu Sikul-ah leh Anganwadi Centre-ah te hman thin a ni a, kumin-ah erawh chuan Hripui leng mek avanga Sikul tam tak khar a la nih avangin NDD hmanna Ni bikah hian tuna Sikul kal mek Pawl 10 leh Pawl 12 zirlai te chiah Rulhut hlo hi pek an ni tih a sawi a. Kum 19 leh a aia naupang zawng zawng ten Rulhut hlo hi an ei vek theih nan kumin-ah chuan NDD hi ni khat chiah hmang lovin February 26, 2021 thleng kalpui tur a nih thu leh hemi hun chhung hian Rulhut hlo (Albendazole) hi kum 19 chin hnuailam zawng zawngten In lamah an lo ei theuh theih nan ruahmanna siam a ni tih a sawi bawk.

National Deworming Day (NDD) hi Mizoram District zawng zawngah a rual a hman a ni dawn a, naupang leh tleirawl kum 1-19 tawh phawt chu a huam vek a. He hmalakna hi nu leh pa zawng zawng ten ngai pawimawh theuh turin Esther Lal Ruatkimi, Commissioner & Secretary, School Education Department chuan a chah a. Rulhut avanga natna awm thin – thisen tlakchhamna leh than thu te umbo a nih theih nan nu leh pa te chu an fate faina kawng bakah thianghlimna leh hriselna kawngah te zirtirna tha pe thin turin a chah bawk a ni.

Comments

Chhiar Hlawhte