Vaccine rawn thlen belh leh

Serchhip District-a COVID-19 Vaccine pek tur Dose 500 rawn thlen belh leh tawhin hun reilote ah pek chhunzawm leh tum a ni a, Vaccine dawng tawh zingah damdawi In panpui ngai khawpa harsatna tawk an awm hriat a ni lo.

Serchhip CMO Office aTanga thu kan dawn danin Serchhip District-a Health Care Workers mi 450 te hnenah COVID-19 Vaccine pek tur rawn thleng chu pek zawh a nih hnuah a thawh hnihna a Health Care Workers te Vaccine pek tur, Covi-sheild Dose 500 chu Serchhip rawn thlenpui a ni leh tawh a, ruahman lawk ang chuan tunkar hian North Vanlaiphai PHC hnuaia Health Care Workers te chu Vaccine hi pek leh tum niin hemi hnu hian Chhingchhip PHC leh East Lungdar PHC hnuaia Health Care Workers te chu vaccine hi pek leh tur an ni dawn a ni.

Tun thlengin Serchhip District chhunga Health Care Workers vaccine la tur inziaklut chu mi 855 ni tawhin heng ah hian Assam Rifles leh BSF-a Health Care Workers te an tello thung a, tun thlengin mi 493 te hnenah Vaccine hi pek ni tawhin tuna Vaccine rawn thlen belh hmang hian Serchhip District-a Health Care Workers te chu vaccine pek kim vek theih an ni dawn a ni.

Serchhip District Level Task Force on COVID-19 Vaccination-a Member Secretary, Dr. Lalhlunpuii chuan Serchhip District chhunga Vaccine pek tawh zingah hian hri danna lak hnua insawiselna neih avanga damdawi In panpui ngai leh enkawl zui ngai an la awmlo tih a sawi a, hri danna lak a nih chuan khawsik leh taksa na Them Thum te chu a awm thei tih sawiin, hetiang bak harsatna liantham nei hi tun thlengin Serchhip District-a Covishield dawngtute zingah an la awm loh thu a sawi a ni.