Serchhip-ah National Deworming Day hawnna neiin Rulhut hlo pek beihpui thlak a ni

India sawrkarin hriselna kawnga rampum huapa a hmalakna pakhat, National Deworming Day (NDD) chu nimin khan rampumah hman niin Serchhip-ah pawh he ni-ah hian kum 1 leh kum 19 inkar te hnenah Rulhut hlo pek beihpui thlak a ni.

National Deworming Day (NDD) hawnna hi Serchhip-ah chuan nimin khan District Bawrhsap, Kumar Abhishek IAS hovin Govt. H/S Serchhip-ah neih niin he hunah hian Bawrhsap chuan rulhut vangin naupangten thisen an tlachham thei a, eitur tha tlakchham vanga chaklohna ten a bawm thei a, an than chhoh zelnaah leh an rilru lam thlengin chaklohna an nei thei thin tih a sawi a. Hei vang hian Rulhut hlote a hun taka ei-a rulhut laka fihlim a tul tih a sawi a. Zirlai naupangte chu an hriselna vawngthaa thil thalo tinreng laka fihlim tum tlat turin a fuih bakah Exam tura an inbuatsaih mek tih a hriatpui thu a sawi a, tha taka an exam hmachhawn theuh turin duhsakna a hlan bawk.

Serchhip-a National Deworming Day hawnna inkhawm hi Serchhip CMO, Dr. Laldawngliana Sailo chuan kaihruaiin SMO Dr. Lalhlunpuii leh DEO, Zohmangaihi te bakah he School-a thawktute leh zirlaite an tel a, he huna tel zirlai naupangte hian Rulhut hlo hi an ei nghal a ni.

National Deworming Day, 2021 hi nimin, February 22, 2021 atanga tun thla ni 26 chhung hian kalpui tur a ni dawn a. Hemi hun chhung hian khawtina ASHA Workers ten In tin-a lutin rulhut hlo damdawi ei thei tur chin, naupang kum 1 atanga kum 19 inkar te chu he damdawi hi an sem kual dawn a. A ei tur chinte hian ASHA Worker te hmuh lai ngeiin damdawi hi ei tur niin Serchhip District-ah chuan kum 1 atanga 19 mi 21,095 te hnenah Rulhut hlo hi pek tura ruahman a nih thu Health Department hotute chuan an sawi a ni.

National Deworming Day (NDD) hi kum 2015-ah India ram State 11-ah hman tan a ni a, kum 2016 atangin India ram pumah hman niin Mizoram-ah pawh kalpui a ni a, kum khatah vawi hnih, February leh August-ah te hman thin a ni a. National Deworming Day-ah hian naupang leh tleirawl, kum 1-19 inkar te hnenah a thlawnin Rulhut Hlo (Albendazole) eitir thin niin School leh Anganwadi Centre-ah te eitir thin an ni a. COVID-19 hri leng avangin nikum August thla khan ASHA ten In leh kawt-thler-ah te eina hun hi an lo buatsaih tawh a. Tun tumah hian ASHA ten In tin-a lut lawrin Rulhut hlo hi pek leh turin ruahmanna siam a ni.