Mizoram-ah nikum chhungin Police in thubuai 2317 ziaklutin kum 5 chhunga a tlem ber tum a ni

Nikum (2020) khan Mizoram Police te chuan thubuai 2317 an ziaklut a, hei hi kum 5 kalta chhunga thubuai ziahluh tlem ber kum a ni.

Hetihlai hian nikum kha kum 5 kalta chhunga tualthah thubuai ziahluh tam ber kum a ni thung. Nikum chhung khan Mizoram Police te chuan IPC hnuaiah thubuai 1804 leh Local and Special law (Non-IPC) hnuaiah thubuai 513 an ziaklut a, nikum chhunga thubuai ziahluh zawng zawng hi a vaiin 2317 a ni a, kum 5 kalta, 2016 atanga chhutin nikum kha thubuai ziahluh tlem ber kum a ni. IPC hnuaiah hian rukruk thubuai ziahluh a tam ber a, thubuai 684 ziahluh a niin hei hi IPC hnuaia thubuai ziahluh atanga chhutin 38% a tling a, inrawk thubuai chu a dawttu niin case 414 ziahluh a ni a, hei hi 30% a tling bawk a ni. 

IPC hnuaiah hian nikum chhung khan tualthah thubuai 30 ziahluh a niin hei hi kum 5 kalta chhunga tualthah thubuai ziahluh tam ber kum a ni a. Tualthah thubuai hi kum 2016-ah 28, kum 2017-ah 20, kum 2018-ah 22, kum 2019-ah 22 leh kum 2020-ah 30 an ziaklut a ni. Nikum chhung khan pawngsual thleng pawh a tam viau a, Police te chuan nikum khan pawngsual thubuai hi 36 an ziaklut a, pawngsual case hi kum 2016- ah 26, kum 2017-ah 25, kum 2018-ah 53, kum 2019-ah 43 leh kum 2020-ah 36 ziahluh a ni.

Local and Special Law hnuaiah hian thubuai 513 ziahluh a niin thubuai ziahluh zingah hian Zu khapna dan bawhchhia an tam ber a. Zu khapna dan (MLP Act) hnuaiah hian thubuai case 254 ziahluh a niin hei hi thubuai ziahluh atanga chhutin 49.51% a ni a, POCSO case chu a dawttu niin case 126 ziahluh a ni a, thubuai ziahluh atanga chhutin 24.56% niin ND&PS Act hnuaia thubuai 101 (19.68%) chuan a dawt a ni. Nikum 2020 chhung khan February thla ah case ziahluh tam berin thubuai 258 ziahluh a ni a, April ah thubuai ziahluh tlem berin 137 ziah luh a ni bawk.