MJA (SD) Annual Conference Serchhip District Bawrhsap in a hmanpui

MJA Serchhip District chuan Inrinni khan Annual Conference vawi 14-na hmangin Serchhip District Bawrhsap, Kumar Abhishek IAS chuan khuallian niin a hmanpui a, Serchhip-a thla 7 vel a awm tawh chhunga MJA Member te nen thawhhona tha tak an neih thu a sawi a ni.

Serchhip Press Club-a MJA Serchhip District Annual Conference-ah hian District Bawrhsap chuan Serchhip Press Club sak a ni leh hawn a ni ta chu lawmawm a tih thu sawiin, Press Club chu Serchhip District nghawr tur thil pawimawh leh hmasawnna tur thil thar chhuahna hmun a la nih ngei a beisei thu a sawi. Serchhip District Bawrhsap chuan Media-te chu democracy-ah hna pawimawh tak an thawk tih sawiin, mipui leh sawrkar thlunzawmtu pawimawh tak an ni tih a sawi a, sawrkar hmalaknate mipui hriat tura an puanchhuah bakah, khawtlang mipui harsatna leh mamawh te an zir bawk tih a sawi a, democracy ramah hian media chak, zalen leh tihbik neilo a awm loh chuan democracy hian awmzia a nei lo a ti bawk.

Kumar Abhishek chuan Social media-ah information a tam a, a dik leh dik loh thliar a har a, hetah hian media te mawhphurhna a sang hle tih pawh sawiin, State leh District-a Media-te hnathawh chu ropui a ti takzet tih a sawi a, sawrkar nen thawhhona tha tak an neih chhunzawm zel chuan a tha zawngin mipui nunphungah hmasawnna a thlen zel a beisei thu a sawi bawk.

MJA Serchhip District Annual Conference hi an Vice President, C. Ramengmawia chuan kaihruaiin he huna thusawitu dang MJA General Hqrs. President, Zonunsanga Khiangte chuan Serchhip Press Club thara Annual Conference hman a ni thei ta chu lawmawm a tih thu sawiin, pawnlam atanga Press Club sakna atana puihna an dawn piah lama District MJA member-te inpekna leh an tha thawhna chu entawntlak a tih thu a sawi a. MJA Serchhip District-ten Covid-19 hri leng chunga Project Site Visit an nei thei chu lawmawm a tih thu sawiin, Project Site Visit hi uar deuh deuh tha a tih thu leh, hei hian hmasawnna hna thawh a ti kalchak a, hnathawh langtlang a siam a, journalist-te hriatna a tipung bawk a, journalist-te hriatna a pun chuan a hlawkna teltu chu mipuite leh sawrkar an ni tih a sawi bawk.

Tunlai khawvelah Smart Phone kan hmang nasa tawh a, thil chhiar nan pawh kan hmang nasa tih sawiin MJA President chuan, mahse print chhuah ngei chhiar chu hriatna a nghet bik a, chuvangin lehkha chhiar chu uar thar a tul a tih thu a sawi a, MJA Gen. Hqrs. President chuan Journalist pension leh Aizawl-a Press Enclave sak tur atana hmalakna te a sawi bawk.

He hunah hian MJA Serchhip District President, Kapliana Pachuau chuan inlawmna thu sawiin Social media hmasawnna a chak tawh a, Social Media-ah chuan duh duhin an sawi a, an ziak a, an thehdarh a, mahse thu diklo leh rintlak loh an ziak avangin Police man, thubuai nei leh jail tang an tam tawh tih sawiin, mipui hian thudik leh rintlak ziak thin journalist te an la zawng reng a ni, a ti a. Social Media-a journalist post leh comment chu dik turah mipuiten an la ngai a, chuvangin ziaka mipui chhiar theih tura kan dah dawn chuan finfiah hmasa phawt thin turin MJA member-te a chah a, chumi tur chuan taimakna leh mi baka thawhrim a ngaih thu a sawi a, chu chu journalist te zahawmna innghahna a ni tiin hma-sawn zel tum theuh turin a sawm nghal bawk a ni.

MJA Serchhip District Annual Conference-ah hian Report hrang hrang ngaih-thlak niin chawhnu lamah rorelna an nei nghal bawk a ni.

Tun dinhmunah MJA Serchhip District-ah hian Member 14 awm mekin heng zinga 11 te hi Serchhip Town Area ami an ni a, Thenzawl-ah 2 leh North Vanlaiphai-ah mi pakhat an awm bawk a ni.