AMC inthlanpui ah MNF in Party mal-a sawrkar siam theiin hnehna an chang

Aizawl Municipal Corporation (AMC) inthlanna a Vote tla te nimin-a chhiar takah rorellai MNF Party chuan Party mal-a sawrkarna siam thei khawpin hnehna an chang a. Hmeichhia te tana Seat hauh 6 zinga 5-ah ZPM chuan hnehna an chang a ni.

AMC inthlan vawi 3-na neih zawh taka Vote tla te chu ruahman lawk angin nimin khan Pachhunga University College-a hmun ruahman ah chhiar a ni ta a, Seat 19 awmna ah rorellai MNF Party chuan Seat 11 la in Party mal-a sawrkarna siam theiin hnehna an chang a, ZPM party chuan Seat 6-ah hnehna changin Congress Party chuan seat 2 an la ve bawk a, he inthlanna chuh ve BJP erawh chuan seat lak an neilo thung a ni. Tun tuma Councillor thlantlin 19 zingah hian mipa 11 telin midang 8 hi hmeichhia an ni a, hmeichhia thlantlin 8 zinga 6 te hi hmeichhia te tana Seat hauh-a thlantlin niin midang pahnih hi a duh apiang chuh theih (General Seat), Ward No. IX leh XV atanga thlantlin an ni thung a, tun tum hi AMC inthlan-a hmeichhia thlantlin an tam ber tum a ni bawk. Tun tumah hian hmeichhia te tana Seat hauh 6 zinga 5-ah ZPM Candidate thlantlin an ni a, General Seat atanga thlantlin hmeichhia hi MNF leh Congress Ticket-a thlantlin an ni bawk.

Tun tum AMC inthlan-a Rorellai MNF Party in seat an lak te hi Ward No. I-ah Lal-rinenga Sailo; Ward No. II-ah Lalringliana; Ward No. IV-ah Laltlanzova Khiangte; Ward No. VI-ah John Zosangliana Ralte; Ward No. VII-ah Vanlalneiha; Ward No. IX-ah B. Lalawmpuii; Ward No. X-ah Chuauzikpuii; Ward No. XI-ah H. Zonunsanga; Ward No. XII-ah R. Thang-lura; Ward No. XIII-ah Lalfakzuala Chenkual leh Ward No. XVII-ah David Zohmangaiha te an ni. MNF atanga thlantlin zingah hian Councillor nilai mi 5 telin Lalrinenga Sailo, Lalring-liana, Laltlanzova Khiangte, B. Lalawmpuii leh H. Zonunsanga te an ni.

ZPM Party in Seat an lak te hi Ward No. III-ah C. Lalchhandami; Ward No. VIII-ah Christina Roluahpuii Sailo; Ward No. XIV-ah Ramthanzauvi; Ward No. XVI-ah R. Lalawmpuii; Ward No. XVIII-ah Malsawm-tluanga Ralte leh Ward No. XIX-ah Baryl Vanneihsangi Tlau te niin an vai hian vawikhat an tlinna vek a ni.

AMC inthlan-a INC in Seat hnih an lak te hi Ward No. V-ah Rosiamngheta leh Ward No. XV-ah Zodingpuii te niin an pahnih hian AMC Term dinglai-a Councillor nilai ve ve an ni a, INC atanga thlantlin Rosiamngheta hi AMC inthlan tum thum neih tawh ah thlantlin vek la niin hetianga thlantlin vek la awmchhun hi a ni bawk.

AMC inthlanpui ah hian Seat la hnem ber MNF hian Vote 51,190 hmuin vote tla za zela 40.30 an hmu a, ZPM in Vote 44,683 (35.18%) hmuin INC in Vote 30,359 (23.90%) leh BJP in Vote 780 (0.61%) an hmu a ni.

AMC-a thlantlin te :

Ward No. 1 Lalrinenga Sailo, MNF

Ward No. 2 Lalringliana, MNF

Ward No. 3 C. Lalchhandami, ZPM

Ward No. 4 Laltlanzova Khiangte, MNF

Ward No. 5 Rosiamngheta, INC

Ward No. 6 John Zosangliana, MNF

Ward No. 7 Vanlalneiha, MNF

Ward No. 8 Christina Roluahpuii Sailo, ZPM

Ward No. 9 B. Lalawmpuii, MNF

Ward No. 10 Chuauzikpuii, MNF

Ward No. 11 H. Zonunsanga, MNF

Ward No. 12 R. Thanglura, MNF

Ward No. 13 Lalfakzuala Chenkual, MNF

Ward No. 14 Ramthanzauvi, ZPM

Ward No. 15 Zodingpuii, INC

Ward No. 16 R. Lalawmpuii, ZPM

Ward No. 17 David Zohmangaiha, MNF

Ward No. 18 Malsawmtluanga Ralte, ZPM

Ward No. 19 Baryl Vanneihsangi, ZPM