Latest News

Dist. Bawrhsap in hmanpui

Urban Development & Poverty Alleviation Department in Mizoram khawpui fai inelna buatsaih a North Vanlaiphai Town in Category-II a lawmman pathumna an lak chu nimin khan lawmin Serchhip District Bawrhsap, Kumar Abhishek chuan khuallian niin a hmanpui a, North Vanlaiphai-a bawlhhlawh paihna tur Motor chu tlangzarh nghal a ni bawk.

North Vanlaiphai Information Centre-a he hun hmanna hi North Vanlaiphai VCP, Laltanpuia chuan kaihruaiin he hun hmanpuitu Serchhip District Bawrhsap, Kumar Abhishek chuan North Vanlaiphai khua in Mizoram pum huap khaw fai inelna a buatsaih a lawmman a lak chu lawmawm a tih thu leh a lawmpui thu sawiin, khawtlang tamrualna rah a nih thu a sawi a ni.

Bawrhsap chuan Serchhip District-a thla sarih vel a awm chhungin vawi engemaw zat North Vanlaiphai khua ah kal a tum tawh thu leh engemaw harsatna avanga a hlawhtlin theihloh hnua he khua a thleng thei ta chu lawmawm a tih thu a sawi a. North Vanlaiphai khua in faina kawnga hma an sawn theihna tura YMA hmalakna a bawlhhlawh paihna Motor (Garbage Truck) an nei thei ta chu lawmawm a tih thu leh khaw-tlang tana YMA thil tih chu lawmawm a tih thu bakah tha a tih thu a sawi a. Kan khawvel thang zelah kan bawlhhlawh te chu paih mai mai lova a tihralna tur nen kan enzui a tul thu a sawi bawk.

Nimin-a tlangzarh tak Bawlhhlawh paihna Motor hi North Vanlaiphai khua in kum 2019-a YMA General Conference a thlen tuma an sum hmanbang atanga an lei niin Tata Yodha (Pick-up) Truck a ni a, nimin-a he hun an hmanna ah hian North Vanlaiphai SDO (Civil), Dorothy Muansangi bakah sawrkar Department aiawh leh NGO bakah Sanitation Committee hruaitute an tel a ni.

District Bawrhsap hian N. Vanlaiphai Govt. High School leh KVK bakah PHC N. Vanlaiphai te pawh a tlawh nghal bawk a ni.

Comments

Chhiar Hlawhte