Chanchin thar thenkhat :

 Hri kai hmuh belh awmlo

Niminpiah khan Mizoram-ah Sample 1,707 enfiah niin heng te atang hian COVID-19 hri kai hmuhchhuah an awmlo. Niminpiah khan ZMC Laboratory-ah Sample 202 enfiah niin District hrang hranga TrueNat Laboratory-ah Sample 44 enfiah a ni bawk a, heng bakah hian Rapid Antigen Test hmangin Sample 1461 enfiah ni bawkin heng atang hian COVID-19 hri kai hmuhchhuah an awmlo a ni. Nimin khan hri kai mi 5 te enkawl dam leh niin heti hian Mizoram-a hri kai hmuhchhuah 4376 atangin 4342 (99.22%) enkawl dam ni tawhin hri kai enkawllai mi 25 an la awm mek a ni.

LADC sawrkar in rem ti lo

Lai Autonomous District Council (LADC)-a Chief Executive Member, Manghmunga Chinzah chuan Myanmar ram buaina avangin kan unaute mangang leh thlaphang-a an awm LADC Sawrkar chuan rem a ti lo tih nimin-a MJA Lawngtlai District Member te nen an inkawmna ah sawiin, mipui rorelna tundin chu LADC Sawrkar chuan a duhpui takzet tih a sawi. LADC-a CEM chuan LADC Sawrkar-a Muster Roll 320 ban an ni chu Council sum indaihlohna phuhrukna tur a nih thu sawiin, Muster Roll ban zingah Sawrkar in a mamawh lemloh tamtak an awm tih a sawi bawk.

Hri leng mek dinhmun thlirho

COVID-19 hrileng mek kara Mizoram din-hmun thlirhona chu nimin khan Health Minister, Dr. R. Lalthangliana hovin SAD Conference Hall-ah neih a ni a, he hunah hian Mizoram University leh School Education Department hnuaia zirna Course hrang hrangte chhunzawm leh hun tura rawtna awmte sawiho a nih hnuah State Executive Committee on Disaster Management, Mizoram hnenah thlen nise an ti. He hunah hian Feb. 3, 2021 thlengin Mizoram-a Healthcare Workers 9995 (65%) te hnenah COVID-19 vaccine, Covishield pek a nih tawh thu leh Mizo-ram-a Healthcare Worker 17,500 hnenah hri danna hi pek tum a nih thu tarlan a ni bawk.

ZPM-ah mithar lawmlut

ZPM ah mithar 875 a lawm-lut a, heng mite lawmluhna puala inkhawm Rengdil Community Hall-a neih ah Lalduhoma chuan tun dinhmunah ZPM chu Opposition Party niin, mimal hlawkna leh hamthatna tur therhlo engmah beisei tur a awm lo tih hrereng chunga, inthlan dawn pawh nilo ah mi 875 laiin ZPM Party zawm duhna thinlung an pu chuan ram siam an duh takzet tih a ni tih a chiang hle niin a sawi a. Ruling apiangin retheite retheihna changchawiin sawrkar leh an tum nia sawiin, “Sem Policy hmangin hma an la a, minti rethei te te a, kan retheihna hre rânin min lei leh an tum, chu chu an politics thiam chhun a ni. Ram thatna tak tak an ngaihtuah duh lova, thil tak tak hi an ti duhlo a ni,” a ti bawk.

Campaign kickoff hun hmang

Congress Party chuan nimin khan Aizawl Hlimen-ah AMC inthlanpui neih tur atan Ward No. 19-ah Campaign Kickoff an nei a, he hun hi Congress PAC Member, Lalsawta chuan hman-puiin Sawrkar tha siam hi a pawimawh ber tih a sawi a. “Sawrkar tha siam turin mipui kan pawimawh a, halpuah hal lo turin kan inngen khan an hal lo mai, mahse a hnuah chuan an hal leh a, mipui hi dem tur kan ni lo. Ram roreltute kan pawimawh a ni,” a ti bawk.

MNYF Street Campaign nei

MNF Thalai, MNYF ten AMC inthlan Campaign beihpui a thlakna 'Sikpui Fehchhuah' Street Campaign an neih mekah nimin khan Chawnpui kawn-ah hun hmang lehin he hunah hian MNYF President, Er. Lalrinawma chuan Aizawl khawpui chhung ti hmasawn tur leh duat taka enkawl tur chuan MNF Party chu an tha ber tih a sawi a, “Kan hotuten Aizawl hmasawnna atana ke an lo pen tawhna, hma an lo lak tawhna te hi kan thlahthlam dawn lova, kan chhunzawm zel dawn a ni,” a ti bawk.

AVBD Mizoram Founder President boral

Damlo a mamawh ten a thlawna thisen an dawn zung zung theihna tura hma la tu pawl, Association for Voluntary Blood Donation (AVBD) Mizoram dintu leh President hmasa ber, Dr. R. Tlangkunga (79) chu nimin tlai khan a boral a, Vawiin hian vuiliam a ni ang.