Latest News

Chanchin thar thenkhat :

Hri kai 6 hmuh leh a ni

Niminpiah khan Mizoram-ah Sample 995 enfiah niin heng atang hian COVID-19 hri kai mi 6 hmuh leh an ni a, heng zinga mi 5 te hi Rapid Antigen Test hmanga hri kai hmuhchhuah niin Aizawl District-ah mi 4 leh Saitual District-ah mi pakhat an ni a, Aizawl District ami te hi tualchhung-a hri inkaichhawng an ni. Hri kai mi pakhat hi Champhai District-a TrueNat Laboratory-a Sample enfiah atanga hri kai niin tual-chhung-a hri inkaichhawng a ni. Niminpiah-a hri kai hmuhchhuah zingah hian kumin Feb. 4-a hri kai tih hmuhchhuah, Feb. 14-a Negative result a neih avanga chhuahtir pawh a tel a ni.

Nimin khan Mizoram-a COVID-19 hri kai enkawl mi 4 te chu hri lakah fihlimin anmahni enkawlna hmun atanga chhuahtir an ni a, heti hian nimin tlai dar 5:00 thleng khan Mizoram-a hri kai hmuhchhuah chu 4419 niin an zinga 4386 te chu enkawl dam an ni tawh a, tunah hian hri kai hmuhchhuah atanga za zela 99.25 te chu enkawl dam ni tawhin hri kai enkawllai 23 an la awm a, hri kai zingah nunna chan mi 10 an awm tawh bawk a ni.


College te hawng tan dawn

Thla thar March 1 atang khian Mizoram-a College hrang hrangah zirna bul tan turin rua-hmanna siam a ni. Nimin khan Health Minister, Dr. R. Lalthangliana hovin Aizawl-a Assembly Annexe Committee Room-ah Mizoram-a College hawn chungchang sawihona neih a ni a, he thut-khawm a tel te hian Mizoram pumah College leh zirna In sang zawk hrang hrang – University te, NIT, College of Veterinary Sciences leh a dangte chu March ni 1, 2021 (Thawhtanni) atangin hawn leh nise tiin an rel a, hemi chungchanga SOP duan tawh te pawh enho niin siamthat ngai lai tlem awm te chu an sawiho hnuin pawm a ni. Heng zirna In-ah te hian uluk takin College thuneituten Thermal Screening an kalpui a tul dawn a, ruahmana hi Health Department te nen inberawn a an siam a ngai dawn a ni.


Minister in Open Gym hawng

Sports Minister, Robert Romawia Royte chuan nimin zing khan Socio-Economic Development Policy (SEDP) kaltlanga siam Outdoor Gym (Open Gym) chu R.Dengthuama Indoor Stadium, Mualpui-ah a hawng a, Outdoor Gym atan hian Mapuia Enterprise, Ritz Market, Dawrpui, Aizawl chu supply leh installation hna thawk tura thlan an ni a, Project Cost hi cheng nuai 60 niin Gym bungrua leina atan Rs. 55,70,000/- hman niin a hmunhma cheina atan leh a remkhawmna atan Rs. 4,30,000/- sen a ni bawk.


May 4-ah Session tan dawn

Mizoram sawrkar chuan kum 2021-2022  Academic Session chu May 4, 2021 atanga tan turin ruahmanna a siam a, hemi chung-chang ah hian School Education Department Director, James Lalrinchhana chuan School Calendar pangngai ah kum 2020-2021 Session chu kumin March thla a tawp tur a ni tih sawiin, amaherawh chu hri leng avanga Season a tluan tak loh avangin zirlai naupang ten zirna tlem tal an dawn theihna turin Academic Session hi pawhsei a nih tak thu a sawi a ni.

Comments

Chhiar Hlawhte