Latest News

Central Jail-a Pathian thu zir te Certificate hlan

Set Free Ministries-in (SFM) in Central Jail-a tang te tana Pathian thu zirna an buatsaih Course 3-na Graduation Day chu nimin khan hman niin Home Minister, Lalchamliana chuan hmanpuiin Certificate a sem.

Nimin-a he hun hmanna ah hian Home Minister, Lalchamliana chuan mihring in taksa lam mamawh - ei leh in, silh leh fen leh adangte kan mamawh angin Thlarau nun enkawlna kan mamawh bawk a, Pathian thu zirtir-a hetiang rawngbawlna, lung In tangte tan SFM in an nei thin chu ropui a tih thu leh ngaihsanawm a tih thu sawiin, chhunzawm zel tha a tih thu a sawi a. Mihring rilru-ah sualin rawng a bawl avang te, Dan hriat loh avangte in lung In-ah mikhual tur an awm fo thin tih sawiin, chuvangin mi tupawhin Dan hi a lal ber a, Dan reng reng tha taka zawm a pawimawh tih hi kan hriat nawn fo a tul thu a sawi bawk.

Sawrkarin lung In tang ten an tan chhungin thiamthil an zira, lung In atanga an chhuah hunah nun kawng dik zawha eizawnna kawng an neih chu a ngaipawimawh hle tih pawh sawiin Home Minister chuan, Sofa set siam, Cement Mistri hna zir te leh adangte a kalpui mek a, Electric Wiring leh Aluminium Chokut leh tukverh siam training pawh MYC nen tangdunin buatsaih vat tum a nih thu a sawi a. Hetianga ruahmanna Sawrkar leh pawl hrang hrang ten an chhawpchhuah te chu hmang tangkai turin lung In tang mek te chu a chah bawk a. Lung In-a tang mekte chu hrehawm leh zahthlak thil a ngai lova, Jail-a an hun hman chu Pathian Thu nen mahni insiamthat nan hmang a, rilru thar siam a, tum thar nei a, an chhuah hunah nun kawng pangngai zawh tura mahni inbuatsaih turin a fuih bawk.

Home Minister hian he Exam pass zawng zawng hnenah Certificate a hlan a, Set Free Ministries te buatsaih Bible zirna hi Central Jail a tang mi 159 in an zir a, an pass vek a ni. Hetiang zirna hi SFM in kum 2018 atangin Central Jail-ah hian an lo kalpui tawh a ni. Tun dinhmunah Central Jail-ah hian tang mipa 562 leh hmeichhia 42 an awm mek a ni.

Comments

Chhiar Hlawhte