Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

AMC inthlanpui vawi 3-na neih zawh takah Political Party hrang hrangin lawmthu an sawi

Nimin-a AMC inthlana Vote tla te chhiar a nih hnuah Party hrang hrangte chuan thu-chhuah siamin lawmthu an sawi.

MNF party chuan AMC inthlanna a sawrkarna siam thei tura hnehna an chang chu lawmthu sawiin, sawrkar thlawpa thawhpui zel turin Aizawl mipuite an ngen bawk. Nimin-a thuchhuah an siamah MNF Party chuan Pathian leh mipui zarah MNF chuan seat 11 lain AMC-ah sawrkarna a siam dawn ta tih tarlangin, Aizawl mipui vote thlaktu zawng zawngte chungah lawmthu sawiin, a bik takin MNF sawrkar ring tawka vote hlantute chungah lawmthu an sawi a. AMC inthlana MNF-in hnehna a chang hi Chief Minister, Zoramthanga kaihhruaina hnuaia State sawrkar chak tak, ding mek mipuiin an rin tawkzia lanna a ni tih an hriat thu tarlangin, “He AMC sawrkar MNF kaihhruai hi tha taka thlawp a, thawhpui turin Aizawl mipuite kan ngen tak meuh a ni,” an ti.

ZPM Party pawhin AMC inthlanna a Ward 6 lai-a hnehna an chang chu lawmawm an tih thu nimin khan thuchhuah siamin an tarlang a. ZPM thuchhuah chuan AMC Ward 19 awmah ZPM Party chuan Ward 6 laiah hnehna an chang thei chu lawmawm an tih thu sawiin, AMC-a vote thlaktu zawng zawng chungah leh ZPM Party candidate lo Vote tute zawng zawng hnenah lawmthu an sawi a. Tun tum AMC inthlan hi ZPM Party chuan an vawikhat chuh ve na chauh a ni tih sawiin, “Vawikhat kan chuh ve naah Ward 6 laia hnehna kan chang leh hnehna chan zawh chiah lohna Ward engemawzat ah vote sang tak tak kan hmu hian kum 2023 General Election lo awm turah beiseina sang tak min neihtir a ni,” an ti a. Rorelna dik leh Sawrkar tha din turin a hma aia nasa zawka tan la ho zel turin an sawm bawk a ni.

Congress Party pawhin Congress Party tana duhsakna Vote hlu tak petute zawng zawng hnenah lawmthu an sawi a. Nimin-a thuchhuah an siamah MPCC chuan AMC inthlanna neih zawh taka thlantlin te chu an lawmpui tih sawiin, khawpui hmasawnna leh chenna nuam din tura thawk tur leh dikna hum turin AMC Councillor thlan thar zawng zawngte an chah a. AMC inthlanah hian mi tam takin Party mi induhsakna chauha an ngaih thin Politics-ah hmel thar hmuh theiha a awm chu lawmawm an ti tak meuh meuh tih sawiin, “Mi tha leh chhawr tlak, ram leh hnam tana thawk tur Candidate atan dah an ni vek a. Kohhran leh NGO te ngenna leh thawhhona avanga hmasawnna duhawm tak kan hmu thei hi Congress Party chuan lawmawm a ti hle a ni,” an ti a. Mipuite chu ram leh hnam tana nasa zawka thawkho zel turin an sawm bawk.

Comments

Chhiar Hlawhte