Latest News

Serchhip District chhunga SDO (C) leh RD Block thuthmun ah India Republic Day hmang

India Republic Day vawi 72-na chu nimin khan Serchhip District chhunga Civil Sub-Division leh RD Block thuthmun ah te pawh urhsun taka hman a ni.

India Republic Day vawi 72-na hi Thenzawl-ah chuan SDO(Civil) Office kawt, Thenzawl Kanan Veng-ah hman a ni a, Thenzawl SDO (Civil), Kulothungan A, IAS chu khuallian niin India Hnam Puanzar a pawtparh a ni. Khuallian chuan Thenzawl Sub-Division huamchhunga Sawrkar Department hmalakna leh hmasawnna hrang hrang a sawi a, Ministry of Tribal Affairs, Govt. of India in tunhnaiah Thenzawl Handloom Cluster cheithat nan cheng nuai 75 a rawn sanctioned thu a sawi bawk.

Thenzawl-a Republic Day hmanna ah hian Faina kawnga inelna a titha te hnenah lawmman sem a ni a, Thenzawl PTS-a Police hnathawk tha chawimawina dawngtu Law Instructor (MRP) Sub-Inspector, Lalzidinga Colney hnenah ‘Union Home Minister Award for Execellence in Police Training’ hlan a ni a, ani hi Mizoram Police (MRP) bikah chuan hetiang chawimawina dawng hmasa ber a ni a, ani bakah hian Sub-Inspector (Armed Branch), Senior Drill Instructor (SDI), KP. Sharma hnenah ‘Union Home Minister Award for Execellence in Police Training’ hlan a ni bawk.

North Vanlaiphai-ah chuan SDO (C) Complex-ah India Republic Day vawi 72-na hi hman niin Serchhip Election Officer, Vanlalhmachhuana chu khuallian niin India Hman puanzar a pawtparh a, mipuite hnenah thuchah sawiin, N. Vanlaiphai khaw chhung-a Department hrang hrangte hmalakna a sawi bawk. He hunah hian N.Vanlaiphai VC Sanitation Bial hrang hrang faina lawmman sem a ni a, faina kawnga thawk tha mimal hnênah lawmman sem a ni bawk.

East Lungdar RD Block thuthmun, East Lungdar-ah pawh India Republic Day vawi 72-na hi hman niin East Lungdar BDO, H. Lalhruaitluanga chuan East Lungdar BDO Office kawt-ah India Hnam puanzar a pawtparh a, mipuite tana sawrkarin hmasawnna kawng hrang hrang a thawh mek dan te a sawi bawk a ni. Kumin a India Republic Day lawmna hi hri leng kara neih a nih avangin mi sawmbik te chauh telin hri leng laka himna tura sawrkar in ruahmanna a siam te zawm chungin hun hman a ni.

Comments

Chhiar Hlawhte