Chanchin thar thenkhat :

Field laih hna bul tan

Khumtung khua-a MLA Fund hmanga Football Field laihna tur Pathian hnena tawngtai-a hlanna leh hnathawh bul tanna chu nimin khan bialtu MLA leh Assembly Deputy Speaker, Er. Lalrinawma hovin neih a ni a. He hunah hian Khumtung khawtlang hruaitu VC Members te bakah Pawl hrang hrang- YMA, MHIP, MUP, GSA leh MNF Party hruaitu telin bialtu MLA leh Deputy Speaker, Er. Lalrinawma chuan MLA Fund an hmanna tam zawk chu kuthna-thawktute tan a nih thu a sawi a, infiammi te infiamna tur hmunhma te chu a ngaih pawimawh a nih thu a sawi. Tuikum bialtu MLA chuan MP (Lok Sabha) Model Village an nihna hre reng tura he huna tel te chu chahin, “Kan eizawnna ah pawh entawnthlaka hnathawh a pawimawh a ni,” a ti a, he Field laihna tura ram petute chungah lawmthu sawiin, Field puitling an neih ngei a duhsak thu a sawi bawk.

PAMRA Special Assembly nei

Peace Accord MNF Returnees Association (PAMRA) chuan nimin khan kumtin-a General Assembly an neih thin chu hri leng avanga neih theih a nih loh avangin nimin khan Aizawl ah Special Assembly an nei a, he Special Assembly hian Resolution pass in Mizoram sawrkar hotute leh MNF Party hruaitute chu Pathian leh kan ram tana zalenna an sual pui, an hotute an nih angin an thlawp tlat dawn tih an tarlang a. Mizoram Sawrkar in Budget Head-a MNF Returnee te Resettlement-na tura sum a dah chu tangkai zawka hman thuai an duh thu leh Maumual ram-a Sawrkarin Inhmun a pek chu a rang thei ang bera enkawl sakin chinfel sak se an duh thu an sawi bawk.

Mason leh Plumber training

Nimin khan Champhai-ah Jal Jeevan Mission kaltlangin Cement Mistiri (Mason) leh Tui pipe vuah leh a chhe siam (Plumber) Training neih tan a ni a, khaw 35 atangin Mason 26 leh Plumber 42, an vaiin mi 68 an tel a ni.

MPCC in Manifesto tlangzarh

Mizoram Pradesh Congress Committee (MPCC) chuan Aizawl Municipal Corporation (AMC) inthlanna neih tura an Manifesto tlang-zarhna leh Campaign hawnna hun nizan hmasa khan Ignite Studio, Aizawl-ah an nei a, he hunah hian MPCC Treasurer leh Congress Legislature Party (CLP) Leader, Zodintluanga chuan tuna Congress Party-in Aizawl khawpui chhunga an ngaih pawimawh ber chu Bawlhhlawh senghawi dan a ni tih sawiin, “AMC Election 2021-ah hian mipuite'n Congress Party min thlangtling a nih chuan bawlhhlawh paih dan mipui tana awlsam zawk leh tha zawk kan siam nghal dawn a ni,” a ti bawk. Manifesto-ah hian hmalakna tur point 6 tarlan a ni.

Padma Award dawng dawn

India rama Civil mite chawimawina sang, Padma Award dawng turte chu puanchhuah niin kumin-a Padma Shri dawng tur zingah Mizoram atangin B. Sangkhumi (Social Work) chu a tel a ni. Kumin hian mi 119 te hnenah Padma Award hi hlan tur a ni dawn a, Civil mite chawimawina sang ber, ‘Bharat Ratna’ dawng tur an awm lova, Padma Vibhushan dawng tur mi 7 awmin Padma Bhushan dawng tur mi 10 an awm a, Padma Shri dawng tur mi 102 an awm bawk a ni. Kumin a chawimawina dawng tur zingah hian hmeichhia 29 an tel a, rampawn atanga dawng tur mi 10 an awm bakah boral tawh mi 16 an awm bawk a ni.