Latest News

Mizoram-ah hri kai mi 5 hmuh belh leh an ni

Niminpiah-a Mizoram-a Sample enfiah atangin COVID-19 hri kai mi 5 hmuh belh leh niin Mizoram-a hri kai hmuhchhuah chu 4356 an tling tawh.

Niminpiah-a hri kai hmuhchhuah thar mi 5 te hi ZMC Laboratory-a Sample enfiah 398 atanga hri kai hmuh te vek an ni a, an zinga mi pahnih te hi tunhnaia State pawn atanga rawn lut niin midang pathum te hi tunhnaia tualchhung-a hri kai hmuhchhuah te nen inkawmhnaihna an neih avanga inkhunghrang mek te an ni thung. Niminpiah khan District hrang hranga TrueNat Laboratory-ah Sample 166 enfiah niin hri kai hmuh an awm lova, Rapid Antigen Test hmanga Sample 780 enfiah atangin hri kai hmuhchhuah an awmlo bawk a ni.

Nimin khan Mizoram-a COVID-19 hri kai mi 2 te chu hri laka an fihlim hnuah anmahni enkawlna hmun atanga chhuahtir an ni leh a, heti hian nimin thleng khan Mizoram-ah Sample enfia 2,02,585 tling tawhin heng atang hian COVID-19 hri kai 4356 hmuhchhuah an ni tawh a, hri kai zinga 4300 te chu enkawl dam ni tawhin tun thlengin hri kai atangin zaa 98.71 te chu enkawl dam an ni tawh a, tunah hian hri kai enkawllai mi 47 la awm mekin hri kai zingah nunna chan mi 9 an awm tawh bawk a ni.

Comments

Popular News (Last 30 Days)