Latest News

Serchhip District-ah ‘Road Safety Month’ hawnna Addl. DC hovin neih a ni

Rampum-a 'Road Safety Month' hman tur chu nimin khan Serchhip District-ah pawh a hawnna hun hman niin Serchhip District Addl. DC, Lalmuansanga Ralte chuan ‘Road Safety Month’ hi a hawng a, lirthei khalhtute tana hriattur pawimawh hrang hrang inzirtirna neih nghal a ni.

Serchhip DC’s Conference Hall-a Road Safety Month hawnna hunah hian khuallian, Serchhip Addl. DC, Lalmuansanga Ralte chuan kum dangah chuan hetiang hun hi ‘Road Safety Week’ tiin Hapta khat awh tura hman thin nimahse kumin atang chuan sawrkar laipui chuan Hapta mai duh tawk lovin thla khat hmang turin ruahmanna a rawn siam tih a sawi a. India ram chu khawvela lirthei chunga thihna thleng za zela 6 hauh phak a ni tih sawiin, kumtin nunna leh bungrua tam tak kan chan a, chuvang chuan kawngpuia himna hi kan ngaihpawimawh deuh deuh a tul tak zet a ni, a ti. Mizoram-ah pawh lirtheia chetsualna a awm fo a, heng chhiatna laka kan him theih nana pawimawh ber chu fimkhurna leh Dan zawmna a ni tih sawiin, khualzin phur thin lirthei khalhtute phei chu kawng-a an lirthei khalh ah mai nilova an incheina te, an tawngkamte thlenga fimkhur tur an ni tih a sawi a, Lamlian-a fimkhur thla kan hman hi inhrilhhriat tharna ang hun mai a ni a, nitin-in, kumtluanin fimkhur takin lirtheite kan hmangin, kawngpui pawh him takin kan enkawl zawk tur a ni, tiin kalkhawmte a chah a ni.

Serchhip District Transport Officer (DTO), Lalengthanga Hnamte kaihhruai he hunah hian Serchhip District Addl. SP, PC. Laltanpuia chuan 'Traffic Rules zawm pawimawhna' tih thupui hmanga thu sawiin, Dan siam reng reng chu mipuite himna tura siam a nih thu leh hei vang hian kan zawm that a pawimawh thu a sawi a. Dan zawmlo leh thupek zawmlo ven ngai kan awm reng chu thil buaithlak a nih thu pawh sawiin, vengtu (Police) te an awmloh avanga Dan bawhchhiat pawi ti lo kan awm thin chu pawi a tih thu a sawi.

Addl. SP chuan kum 2019, 2020 leh 2021-ah Serchhip District-ah lirthei chetsualna avanga nunna chan mi paruk an awm tawh thu pawh sawiin, tualthahna avanga nunna chan ai pawha an tam zawk thu leh India ramah minute 4 dan zelah lirthei chetsualna avanga nunna chan mi pakhat zel awm anga chhut a nih thu pawh sawiin, natna tam tak, kan hlauh em em te ai pawha thihna thlen nasa tu anih thu avangin chetsualna thleng thei laka kan fimkhut a tul thu leh keimahni mai bakah lirthei khalhtu dangte leh kawngpui-a kal thin te kan fimkhur kep zel a pawimawh thu a sawi bawk.

Serchhip DTO Office-a Motor Vehicle Inspector (MVI), Lalrohlua pawhin 'Insurance and Motor Accident' tih thupui hmanga thu sawiin, Motor Insurance chu lirthei khalhchhuah dawn-a Dan in a phut a nih thu leh hei hi lirthei chetsualna kan tawh thulha zangnadawmna kan hmuh theihna tur a nih thu a sawi a, amaherawh chu Insurance kan ti chung pawhin sawrkar in Dan a siam hrang hrang te kan zawm a tul thu sawiin, hei hi zangna-dawmna kan hmuhna tur atana thil pawimawh a nih thu leh Dan kan zawmloh avanga zang-nadawmna kan hmuh tur ang pawh kan hmuh loh phah thin thu a sawi a. Lirthei khalhtu ten chetsualna kan tawk palh a nih chuan darkar 24 chhunga Police hnena hriattir tur a nih thu a sawi a, lirthei neitu leh khalhtu te chu an document pawimawh te uluk taka vawng turin a chah bawk.

Kumin-a Road Safety Month/Week hman hi tum 32 hmanna niin kumin hian thupui atan ‘Fimkhur la, Nun humhim rawh’ tih chu hman a ni a, thla thar February ni 17 thleng awh tur a ni a. Nimin-a Road Safety Month hawnna hun hi Serchhip DC Office-a Superintendent, R. Lalmuankimi chuan lawmthu sawina hmangin a khar a, sawmbik mi pawi-mawh te an tel a ni.

Comments

Chhiar Hlawhte