Latest News

Serchhip Blood Bank-ah mi tlawmngai ten a thlawna thisen an pek a pung

Sawrkar kum kal mek (2020-2021) chhungin Serchhip Blood Bank-a a thlawna thisen pek chu thisen pek zawng zawng atanga chhutin zaa 95.11 a tling tawh a. Hetihlai hian kum kalta (2019-2020) aiin kumin sawrkar kum kal mekah hian Serchhip Blood Bank-a thisen pek chu a pung chho dawn niin a lang.

Mizoram State AIDS Control Society (MSACS) chhinchhiahna atanga a lan danin sawrkar kum kal mek (2020-2021)-a thla 9 (April-December, 2020) chhung khan Serchhip District Hospital Blood Bank hian thisen Unit 982 dawng tawhin heng atanga Unit 934 te chu mi tlawmngai ten a thlawna an pek (Voluntary Donation) a ni a, hei hi thisen pek zawng zawng atanga chhutin zaa 95.11 a ni a, hemi chhung hian Blood Donation Camp tum 28 zet neih a ni tawh a, heng Camp buatsaih ah hian thisen Unit 759 lak niin a bak Unit 175 te chu mi tlawmngai ten mahni-a Blood Bank-ah kal-a thisen an pek an ni thung.

Hetihlai hian sawrkar kum liamta, 2019-2020 aiin sawrkar kum kalmek, 2020-2021-ah hian Serchhip Blood Bank-a thisen pek hi a pung chho dawn niin a lang thung a, chhinchhiahna atanga a lan danin sawrkar kum liam, Arpil 1, 2019-March 31, 2020 chhung khan Serchhip Blood Bank-a thisen pek zawng zawng chu Unit 986 niin hei hi tun sawrkar kum kal mek thla kua (9) chhunga thisen pek tawh zawng zawng aiin Unit 4 chiah in a tam a, tunah hian sawrkar kum kal mekah thla thum (3) hman tur ala awm avangin thisen pek hi pung chho leh tura ngaih niin sawrkar kum liamta-a Serchhip Blood Bank-a thisen pek Unit 986 atanga za zela 91.58 chu mi tlawmngai ten a thlawna an pek a ni.

Sawrkar kum kalmek ah hian Mizoram puma Blood Bank 11-ah thisen Unit 19,298 pek ni tawhin heng atanga Unit 17,418 chu Voluntary Blood Donation a ni a, hei hi thisen pek zawng zawng atanga chhutin zaa 90.25 a ni a, hemi chhung hian Blood Donation Camp tum 409 buatsaih ni tawhin heng ah hian thisen Unit 11,384 lak a ni tawh thung a ni.

Mizoram-a Blood Bank hrang hrang ten sawrkar kum kalmek-a thisen an dawn atangin District Hospital, Siaha Blood Bank chu a thlawna thisen pek dawng tam ber niin thisen an dawn zawng zawng atanga chhuta zaa 99.63 chu mi tlawmngai ten a thlawna an pek a ni a, hemi hun chhung hian thisen Unit 809 an dawng a, Civil Hospital Lunglei Blood Bank (95.21%) leh Christian Hospital Serkawn Blood Bank (95.16%) ten dawtin Serchhip District Hospital Blood Bank hian a dawt leh a ni.

Comments

Chhiar Hlawhte