Chanchin thar thenkhat :

Health Minister in tlawh

Health Minister, Dr. R. Lalthangliana chuan nimin khan Zemabawk-a Mizoram State Cancer Institute chu a tlawh. Health Minister hian Mizo-ram State Cancer Institute-a cheng vbc. 8.8 man tur Cancer Hospital sak mek tlawhin an hnathawh dan a enfiah a, Cancer Hospital thar tur hi CB Engineers ten sa in tunah hian hna 20% thawh zawh tawh a ni a, ruahman anga hna a kal tluan chuan kumin March thla hian sak zawh hman beisei a ni. Health Minister hian Cancer Hospital bula Tertiary Care Cancer Centre (Cancer hemna khawlpui) pawh a tlawh nghal a, cheng nuai 138 senga sak zirlai 20 awm theihna tur Zemabawk-a Auxiliary Nursing Midwifery (ANM) School Hostel Building sak mek leh RIPANS hmun te pawh a tlawh nghal bawk.

School la tan dawnlo

School Education Minister, Lalchhamdama Ralte chuan tun thla ni 15-ah School luh tan tura tih ni mahse hrileng lakah mipuite an la him tawk loh avangin School tan a ni dawn rihlo tih a sawi a. Minister chuan Health Department leh State Disaster Management Authority te an rawn thu leh, anni lam hian a la him tawklova an ngaih avangin School hawn a nih rihloh tur thu a sawi. Hetihlai hian HSLC leh HSSLC exan chu ruahman lawk angin kumin April thlaah buatsaih a ni dawn a. MBSE chu Model question siam tura tih an ni thung.

CM hovin thutkhawm nei

Zoram Medical College (ZMC) Governing Council chu Ningani khan Chief Minister Office Conference Hall-ah Chief Minister, Zoramthanga hova thukhawmin ZMC inrel-bawlna dan tur hrang hrang an sawiho a. He hunah hian ZMC-a thawktu lakna inkaihhruina, Recruitment Rules siam chungchang leh Post siam belh ngai te sawiho a ni a. ZMC zauh belhna tur leh Medical Council of India Inspection hma-chhawn mek thlir chunga post hnawhkhat tura phalna pek chungchang te sawiho a ni bawk.

Faina Hnatlangpui nei

Faina kawnga hmalakna kal mek chhunzawmna leh kumthar-a bultanna atan nimin khan Deputy Chief Minister, Tawnluia hovin Aizawl khawpui leh Lengpui Airport inkar kawngpui dung, Bawng-kawn atang Phunchawng thleng thenfai Hna-tlangpui neih a ni a, he hunah hian Deputy Chief Minister chuan faina, hmasawnna leh hriselna te chu an inkungkaih vek avangin faina kawngah thapui thawh chhunzawm a ni dawn tih a sawi a, “Tunah hian sawrkar leh mipuite thawhhona avangin pawnlama zun leh ek thiar awmlohna State, ‘ODF State’ kan ni mek a. Hun reilote ah India ram a State fai ber pawl leh ‘Open Defecation Free Plus State’ nih kan tum a ni,” a ti. Nimin a hna-tlangpui-ah hian mi 400 vel thawkchhuakin Group 30-ah inthendarhin hna an thawk a ni.

I&PR Minister in hmanpui

I&PR Minister, Lalruatkima chuan nimin khan a Pisa-ah RD Secretariat-a thawkte Pathian hnena lawmthu sawina leh Kumthar inhlanna hun a hmanpui a, he hunah hian I&PR Minister chuan Pathian awmpuina leh hruaina changin Sawrkar ruahmanna te, Kohhran leh tlawm-ngai pawl hrang hrangten an tawiawm that avang leh Sawrkar thu leh hla leh tih tur leh tihloh tur te mipuiin an zawm that avangte in Mizoram chu state mal khaia COVID-19 hri kai neih tlemna ber leh COVID-19 avanga boral tlem ber State a ni thei tih sawiin, kan zavaia thawhhona rah a ni tih a sawi a. COVID-19 hrileng kara sawrkar hmalakna chhuanawm tak chu ni 100 inhlawhna hlawhtling taka a kalpui chu a nih thu a sawi bawk.

SEC in ruat thar ta

State Election Commission (SEC) chuan Aizawl Municipal Corporation (AMC) inthlanna neih tur atan Municipal Returning Officer leh Assistant Municipal Returning Officer tur mi 21 ve ve (Reserve-ah 2 ve ve) a ruat thar ta.