Ngaihhnathiamna awmloh hnuah Dan bawhchhia man tam

Nikum October 26 atanga nimin thleng khan Serchhip District-ah COVID-19 hri leng laka himna tura Dan siam bawhchhia mi 2233 man an ni tawh.

Mizoram-a COVID-19 hri leng laka mipuite an him theihna tura hmalakna atan hian Mizoram sawrkar chuan nikum Oct. 26 atang khan ‘COVID-19 No Tolerance Fortnight’ chu a hmang tan a, he Fortnight hi a zawh hnuah ‘COVID-19 No Tolerance Drive’ hman zui zel niin hei hi pawhsei a ni chho ta zel a, nimin thleng khan Serchhip District-ah Dan bawhchhia mi 2233 zet man an ni tawh a, heng mite pawisa chawi chu Rs. 2,94,900/- zet a tling tawh a ni.

Serchhip District chhunga Dan bawh-chhia man zinga 1523 te hi Police Duty ten an man an ni a, Sawrkar in Department hrang hranga thawk te Duty tura a ruat, Executive Duty te chuan Serchhip Town chhungah Dan bawh-chhia mi 316 man tawhin December 1 leh 7-a mi pakhat ve ve an man bak hemi hnu, nimin thleng khan Executive Duty te hian Dan bawhchhia man an nei tawhlo thung a ni.

Serchhip District-a‘COVID-19 No Tolerance Fortnight’ hman a nih chhung, Oct. 26 atanga Nov. 8, 2020 chhung khan Dan bawh-chhia mi 902 man niin an pawisa chawi zawng zawng chu Rs.1,09,600/- a ni a, Nov. 9 atanga Nov. 30 chhunga ‘COVID-19 No Tolerance Drive’ hman leh chhung khan Dan bawhchhia mi 634 manin an pawisa chawi tlingkhawm chu Rs. 82,900/- a ni a, December 1 atanga 31 chhung khan Dan bawhchhia mi 545 man leh niin heng mite pawisa chawi tlingkhawm chu Rs. 81,300/- ni lehin kumin bikah January 1 atanga nimin, January ni 10 thleng khan Dan bawhchhia mi 152 man tawhin an pawisa chawi tlingkhawm chu Rs. 21,100/- a tling tawh bawk a ni.

Dan bawhchhia man te zingah hian hmai tuamna hman loh vanga man tam berin Curfew bawhchhia pawh an tam viau nia thudawn a ni.