EDP Training zawhfel a ni

COVID-19 hri leng avanga State pawn atanga hnathawktu rawn haw te tana Mizoram Youth Commission (MYC) leh Commerce & Industries Department buatsaiha EDP Training Serchhip District-a neih chu nimin khan zawhfel a ni.

Ni thum chhung awh Entrepreneurship Development Training hi nimin khan Serchhip-a I&PR Conference Hall-ah a kharna hun hman niin he hun hmanpuitu Serchhip District Bawhsap, Kumar Abhishek chuan COVID-19 hripui leng avanga State dang atanga kan thalai lo kirte tana mahni-a eizawnna bultan dan inzirtirna hun buatsaih a ni chu lawmawm a tih thu leh he huna tel te chuan an hlawkpui ngei a beisei thu a sawi a, an thil zirte a taka umzui ngama, theihtawp chhuah zui turin a fuih bawk. Hetiang thil buatsaihtu MYC leh Commerce & Industries thawktute chungah Bawrhsap chuan lawmthu sawiin, he Training-a tel mi 22 te hnenah Certificate a hlan nghal a ni.

Nimin-a he training kharna hun hi District Industries Centre, Serchhip-a Functional Manager, Elizabeth Lalremthangi Hmar chuan kaihruaiin hri leng avang hian State pawn-a hna-thawk Serchhip District-a rawn haw mi 153 an awm thu a sawi a, heng zinga thahnem tak chu an hna ah an kir leh tawh thu leh la kir ve theilo te tan hian Skill Development Training pawh la buatsaih tum a nih thu leh NEC-ah Project siam a nih thu a sawi bawk.