Latest News

Lirthei-ah fimkhur tlan a tul

Lirthei-ah fimkhur tlan a tul

Lirthei avanga kawngpui dung-a chet-sualna pumpelh tura fimkhur a tul zia inzirtirna chu rampumah kalpui mek a ni a, Serchhip District-ah pawh lirthei chetsualna avanga thihna tawk leh ramtuileilo-a awm te kan awm phah fo avangin heng chetsualna laka kan him theihna tura inzirtirna hi uar zawka kan kalpui a tul hle mai a. A bik takin heng chetsualna thlenna thin tam ber hi fimkhur tawk loh vang te a nih thin avangin finkhur a tul zia hi kan inzirtir uar sauh sauh a tul a, fimkur lo te pawh kan fimkhur kep a tul chang a awm fo tih kan hriat a tul hle a ni.

Kan nitin khawsak changkang zelah kan khua ah ngei pawh lirthei a pung zel a, tunhmaa kan neih phak tur pawha kan ngaih loh leh mi ta tura kan ngaih thin te kha kan nei ta fur a, tunah chuan lirthei chu kan nitin khawsakna kawnga kan mamawh, a lo-a kan awm theih loh a ni chho tan ta deuh der mai a. Hetiang taka tangkai a ni chung hian mihring in kan thunun tur khawl a nih avangin a thununtute kan fimkhur a tul a, tangkai taka kan hman theih hi kan chhiat vekna thlentu pawh a ni zawk thei tih kan hriat a tul hle a ni.

Mithiam ten an chhut dan chuan lirthei a chetsualna tam ber hi fimkhur tawkloh vang a ni thin a, kan fimkhur tawklohna ah pawh lirthei khalh chak lutuk avanga chetsualna hi a tam ber pawl a nih a rinawm. Tunhnaiah Serchhip khaw-pui chhung kawngpui, NH. 54 chu siamthat mek a ni a, hetianga kawngpui tha kan neih hnu hian kawngpui dung-a chak tak taka tlan leh chesual te pawh kan pung chho leh mek nia sawi a ni bawk. Chuvangin, kawngpui tha kan neih te hi harsatna leh tahna min thlentu a ni zawk thei tih mitin te hian hri ila, kawngpui dung-a lirthei avanga chet-sualna thleng thin pumpelh tur hian fimkhur tlang ila, fimkhur tawklo te pawh kan fimkhur pui an ngai a ni tih i hre reng ang u.

Comments

Popular News (Last 30 Days)