Chanchin thar thenkhat :

 Futsal Ground thar hawng

I&PR Minister, Lalruatkima chuan nimin zing khan Rangvamual Local Council Futsal Ground siam thar chu a hawng. SEDP sum Rs. 9,80,000/- senga siam Rangvamual Local Council Futsal Ground hawnna hunah hian I&PR Minister, Lalruatkima chuan Rangvamual chu Aizawl kawt-chhuah Veng pawimawh tak, Lengpui Airport leh National Highway kal tura kaltlang ngai a ni tih sawiin, Inter-State Truck Terminal awmna veng a nihna angin khual tha leh chhia dawng-sawnna ah khawtlang pawhin hma a sawn zela a hriat thu a sawi a. Rangvamual chu mi tlemte vangin miten an hmuhdan a dang deuh a ni mai thei tih sawiin, amaherawhchu Vengchhung thalaite leh veng hruaituten infiamna hrang hrang ah hmasawn an duhna hi sawrkar chuan a ngai pawimawh tih a sawi bawk.

Chief Minister in tlawh leh

Chief Minister, Zoramthanga chuan nimin zing khan Hlimen-a Smart City hnuaia cheng vbc. 6 hmanga khelmual sakna tur en in, Kulikawn Futsal Ground leh Basketball Court tur an siam mek bakah Tlangnuam Football Field te a tlawh a, hrileng karah sawrkar chuan a thawh theih chin chin te thawkin hma la mahse, ruahmanna tam tak chu thawh lawk theih a nih loh thu a sawi a. Hri danna a lo awm takah chuan boruak pawhin ziaawm lam a pan zel beisei chungin, chak zawka hmasawn hna thawh chhoh zel a nih tur thu a sawi bawk. Chief Minister hi Sports Minister, Robert Romawia Royte chuan a tawiawm a ni.

MPCC in  Governor-ah thlen

Mizoram Pradesh Congress Committee (MPCC) hruaitute chuan nimin khan Mizoram Larsap, PS. Sreedharan Pillai hmuin tunhnaia Kolasib District chhunga Periodic Patta dilna leh a kaihhnawiha buaina thleng ah VC Pass dik tak neituten an ram hlutna ang sum leh pai an dawn theihna tura hma la tur leh diklo taka Periodic Patta neih tuma hmalatute dilna hnawl a nih theih nana hma la turin an ngen a ni.

MNF Candidate turte puang

Aizawl Municipal Corporation (AMC) in-thlanna neih tura MNF Party Candidate turte chu nizan hmasa khan Ignite Studio, Khatla-ah puan an ni a, MNF Party chuan AMC-a Ward 19 te chu Party mal in an chuh vek dawn a ni. AMC a MNF Candidate tur puanna hunah hian MNF President, Zoramthanga chuan an Candidate te chu mi chhuanawm tak tak an nih thu sawiin, “MNF hi Pathian leh kan ram tana ding a ni a, Pathian dah hmasain ram rawng kan bawl ang. Mipuite awpbet tur ni lovin, Pathian tih chungin mipuite rawngbawl turin kan rilru kan inbuatsaih tur a ni,” a ti a, an Candidate te thlangtling turin mipuite chu a ngen bawk.