Latest News

Chanchin thar thenkhat :

District Hospital Siaha building thar hawn a ni

Health Minister Dr. R. Lalthangliana chuan cheng nuai 1592.52 senga sak District Hospital Siaha building thar chu a hawng. District Hospital Siaha building sakna sum hi NLCPR atanga hmuh niin Hospital building bakah Type-IV Quarters leh Administrative Building te a tel a, chhawng li-a sak niin Solar Water Heater, Solar SPV Power Plant leh Smoke/Heat Detector te pawh dah a ni bawk.


Siaha-ah OSC building hawng

Social Welfare Minister, Dr. K. Beichhua chuan nimin zing khan Hmeichhe hleilenna (Domestic or any violence) tuarte tlukluh lailawkna tur hmun, SAKHI One Stop Centre chu Siaha ah a hawng a, he Centre hi NGO, Police, Medical leh Concern Department te tangho-a enkawl tur a nih tih sawiin, “Kan hmeichhe hleilenna tuar ten an hman tangkai ngei theihnan thahnem ngai takin i thawkho ang u,” a ti bawk. Siaha-ah hian kum 2019 August thla atang khan kalpui tan a lo ni tawh a, building hran an neih loh avangin DC Office-a building chu hman niin tunah chuan building hran, cheng nuai 48 seng-a sak chu an nei ta a ni.


Sub-Hqrs. YMA 3 hawng

Mizoram sawrkar in Mizoram-a District thar pathum a siam-ah te nimin khan YMA chuan Sub-Hqrs. an hawng thar a, Hnahthial-ah Sub-Hqrs. YMA hi Central YMA President, Van-lalruata chuan hawngin Khawzawl-ah Central YMA Vice President, Lalhmachhuana chuan hawn bakah Saitual-ah Central YMA General Secretary, Prof. Lalnuntluanga chuan a hawng bawk a ni. Tun dinhmunah Central YMA hnuaiah YMA hian Branch 811 nei mekin Group YMA 45, Sub-Hqrs. YMA 8 a nei ta a, YMA member zawng zawng chu 446,623 an ni mek a ni. Nimin-a Sub-Hqrs. YMA hawnna hun hi CEC Member thenkhat ten an telpui bawk a ni.


Mulbery Seed Farm tlawh

Mizoram sawrkar-a Sericulture Department Secretary, H. Lalthuamluaia chuan nimin khan Lunglei Farm Veng-a Govt. Mulbery Seed Farm chu a tlawh a, thawktu ten harsatna an neih te lo thlenin hmalakna tur pawimawh hrang hrang te an lo thlen bawk a ni. He hunah hian Sericulture Secretary chuan Sericulture Department chu Mizoram tan inghahnatlak a siam a ngaih thu sawiin, a taka kalpui theih anih chuan ram sum leh pai dinhmun pawh a san phah a rin thu a sawi bawk.


Tuikum bialtu MLA in tlawh

Tuikum bialtu MLA leh Assembly Deputy Speaker, Er. Lalrinawma chuan nimin khan a bial chhunga Ngentiang khua tlawhin khawtlang hruaitute nen inkawmna an nei a, Ngentiang khaw-tlang mamawh hrang hrang an lo thlen bawk a ni. He hunah hian Assembly Deputy Speaker chuan a MLA Fund hmanna tam zawk chu kuthna-thawktute tan a nih thu sawiin, khawchhung aiin ramhnuai-ah a Fund a luh hnem zawk thu a sawi a, sawrkar atanga puihna lo thleng tur nghak tawp lova sawrkar karchhuak thei tura taima taka thawk turin a chah bawk. Tuikum bialtu MLA hian Ngentiang khaw ram-a pi pu te hmun pawimawh, ‘Lamlung’ leh a bul-a ‘Khuai Kham’ te chu tlawhin tun aia hlut thiam tul a tih thu leh pawimawh a tih thu a sawi a, hmalak vat a nih theihna turin theih-tawp a chhuah zel tur thu a sawi bawk.

Comments

Popular News (Last 30 Days)