Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Hnahlan khua a Sial vulhna hmun tlawh

Nimin khan Champhai DAO leh FOCUS a DPM, George Lalthanngura leh Champhai DVO, Dr. B.Zonghinga te chuan Hnahlan khua a Sial vulhtu, Mithun Rearing Society-te hmalakna an tlawh a. Fostering Climate Resilient Upland Farming System in the Northeast (FOCUS) Project First Installment kaltlangin Hnahlan khua ah hian AH & Vety Department Champhai District leh FOCUS Project hnuaia Se In sak, a vengtute chawlhbuk tur sak, tui pekna leh enkawl an ngaih changa thlunna tur sak te, Se huang enkawlna tura hmalakna te enfiahin hman theih turin an hawng a, Mithun Shelter-Community Level and Water Supply Facility for Grazing Area hnuaia hmalakna hrang hrangte a hmunah kalchilhin an enfiah bawk. Hnahlan khua ah hian Sial vulh chhung-kaw 14 awmin Sial 88 chuang an vulh mek a ni. 


Nausen rukbo hmuh let a ni

Pathianni zing khawvar hmaa Lunglei Civil Hospital-a nausen ni 4 mi rukbo chu nizan hmasa dar 10:30 vel khan dam taka hmuhlet a ni a, hemi chungchangah hian Lunglei SP, Stephen Lalrinawma chuan nimin khan thuthar thehdarhtute kawmin he nausen hi Vanlalnghaki (40) w/o Lalnunpuia, Tlabung Zodin, a pa te in Lunglei Farm Veng-a awm mek hnen atangin him dam taka hmuhlet leh a ni a. Naute hi Lunglei Civil Hospital-ah a hringtu nu hnenah dahlet niin Police venhimna pek nghal a ni tih a sawi. Lunglei SP chuan Vanlalnghaki hi thu zawhfiah nghal a nih thu leh Dilon Chakma fapa hi January 24, 2021 zinglam dar 4:30 vel khan Civil Hospital Gynae Ward Bed No.13 atanga a lak ngei thu a sawi tih a sawi a. Vanlalnghaki hi kum 2019 leh kum 2020 chhung khan Lunglei Civil Hospital-ah hian IV Grade-in mi aikalin a lo thawk tawh thin a, hetianga naute a ruk chhan hi naute a it vang niin Police te hnenah hian a sawi bawk.


AMC intlan tur thlirho

Aizawl Municipal Corporation (AMC) in-thlan lo awm tur tana inbuatsaihna kalzelah nimin khan Health Department, MPF, NGOs, MKHC leh Aizawl City LC Association aiawhte chuan District Municipal Election Officer, R. Lalram-nghaka hovin inthlanpui neih tur an sawiho a, Vote thlak hma ni a Polling Station kah thianghlim (disinfect) buaipui turin LLTF te ruat an ni a, Vote thlaktu te inkarhlat-a an awm theih nan MPF ten ruahmanna siam se an tih bakah Vote thlaktu te chhinchhiah hna leh kum upa te leh Vote thlak tura hruai ngai te pawh an hruai dawn bawk a ni.


Kangmei thlen dan thlirho

Nimin khan Champhai-ah District Fire Prevention Committee chu an thukhawm a, he hunah hian Champhai District-ah kum 2020 chhungin kangmei tum 76 chhuak vanga ram hectare 786.6 a zau a kanral thu tarlan niin, heng zinga 61 chu Lo/Leipui/Huan kang vang anih thu leh Forest Area kang tum 4 a awm thu tarlan a ni bawk.


BJP Manifesto tlangzarh

BJP Mizoram Pradesh chuan nimin khan Ai-zawl-a an Office-ah kar thar inhlanna neiin AMC inthlanna a an Manifesto an tlangzarh a, he hunah hian an President, Vanlalhmuaka chuan BJP in Manifesto pariat (8) an neih thu sawiin, “BJP in kan ti ang kan tih chu kan ti thin a, Central ah pawh Manifesto hlawhtlinna turin  hma kan la thin a, tuna Sawrkar kan hrawn mek MNF Sawrkar Pu Zoramthanga kaihhruai ang nilovin hma kan la dawn a ni,” a ti. He hunah hian AMC inthlanna neih tura Ward pahnih-a an Candidate tur an puan belh leh bawk a ni.


Dan lova ramsa phurh man

Sumdawnna atana ramdang atanga dan lova lakluh Zawngte leh Sava chi hrang hrang te chu Zirtawpni kalta, tun thla ni 22 zan zanlai vel khan Vairengte Forest Check Gate-ah man a ni a, heng te hi Maxi Cab pakhat-a phurh a ni. Heng ramsa an man te hi a vaiin 31 a ni a, heng zingah hian Malaysia ram chauha awm Sava chi khat leh Zawngte chikhat te a tel a, a vaiin Rs. 9,89,000/- hu nia chhut a ni. Heng an thil man leh a kengtu mi 2 te chu Directorate of Revenue Intelligence Mizoram kutah hlanin ramsa te hi Sahuan-ah dah nghal a ni.

Comments

Chhiar Hlawhte