Serchhip-a Supply Kudam-ah buhfai chhekkhawl a tlem

Serchhip-a Supply Kudam-ah tunlai hian buhfai a awm mumal loh avangin mipuite hnena Ration buhfai December thla pekchhuah khawp a awm lova, Aizawl atangin quintal 300 rawn pek tura ruahman nghal a ni.

Thudawn danin tunlai hian Serchhip District-a Supply Kudam lian ber, Serchhip-a Supply Kudam-ah buhfai a tlem a, hemi chungchangah hian kan Palai zawhna chhangin Supply Department-a thawktute chuan tunah hian Serchhip bial chhung khawchhak lama mipuite hnena December thla Ration buhfai tur chu pekchhuah kim a nih tawh thu sawiin, Ser-chhip khawpui chhunga sem tur erawh tlem daihlo awmin Retailer hrang hrangah quintal 90 vel a daihlo nia an hriat thu an sawi a. Hetianga buhfai a harsat rih chhan ber pawh hi an hriat loh thu leh hripui leng avanga engemaw harsatna awm nia an ngaih thu an sawi bawk.

Serchhip DCSO, C. Zadailova chuan December thla chhunga mipuite Ration pekchhuah tur hian buhfai quintal 300 chu Muanna Kudam, Zuangtui-I atanga pe turin release Order tihchhuah a nih tawh thu sawiin, nizan kha load an lak nghal a beisei thu a sawi a, mipuite tan thlaphanna tur a awmloh thu sawiin, tuna Ration buhfai pekchhuah hmabak la awm te pawh hi tuna buhfai an rawn pekchhuah a rawn thlen veleh pekchhuah nghal a nih tur thu a sawi bawk.