SAGY zirhona Khumtung khua-ah neih a ni

Mizoram Lok Sabha MP, C. Lalrosanga’n Sansad Adarsh Gram Yojana (SAGY) hnuaia Model Village atana a thlan zinga Serchhip District atanga tel, Khumtung khua ah nimin khan khawtlang hruaitu, NGO leh Self-Help Group te tan SAGY nihphung leh hmalak dan tur inzirtirna neih a ni.

SIRD&PR-a Sr. Faculty, Khawlthangpuia kaihhruai he hun hi Serchhip District Bawrhsap, Kumar Abhishek chuan khuallian nia hmanpuiin Lok Sabha MP in SAGY hnuaia Model Village atana Serchhip District atanga Khumtung khua a thlang leh hemi kaihhnawiha SIRD&PR in a hmasa lama hetianga training hun an buatsaih chu lawmawm a tih thu a sawi a. SAGY thiltum hrang hrangte pawh sawiin, he hmalakna hnuaiah hian infrastructure lian pui pui dinna tura sum ruahman a awm loh thu leh he Scheme hnuaiah a hrana Budget dah a awmloh thu sawiin, amaherawh chu a theih anga hmasawnna tura kawng dap a nih dawn thu leh mipui rilru ah pawh anmahni nen tangruala hmasawnna awm theih dan tura thawhho dan tur te ngaihtuah zel a nih dawn thu a sawi bawk.

He hunah hian Serchhip DRDA Project Director leh Charge Officer, Malsawmtluanga chuan SAGY hnuaia hmalakna tur hrang hrang ruahmanna te a sawi a, heng an hmalakna turah hian khawtlang hruaitute leh mipuite nen thawhhona tha tak an neih a pawimawh thu leh an neih ngei a beisei thu a sawi bawk. Nimin a he hun hmanna ah hian Khumtung khawtlang hruaitu mi 35 telin SAGY atana pawimawh hrang hrang zirho a ni.