Rampumah Hnehna Ni, Vijay Diwas hman a ni

Nimin khan India rampum-ah Vijay Diwas, Hnehna Ni hman a ni a, Mizoram-ah pawh hri leng laka kaihhruaina siam zawm chungin he Ni pual hian hun hman a ni.

Vijay Diwas hriatreng nan hian Mizoram-ah pawh nimin zing khan War Memorial, Treasury Square-ah ram tana nunna hlanta te zahna Pangpar chu sipai bang ten an dah a. Hripui leng avanga kumdang anga ropui taka hman a remchan loh a vangin mi tlemte Mizoram Ex-Services League hruaitute, World War-II Veteran Association President, Assam Rifles Ex-Servicemen President leh Sainik Department Officer ten pangpar hi an dah a ni.

Vijay Diwas (Hnehna Ni) hi kumtin December 16-ah India rampum ah hman thin a ni a. He ni hi India sipai ten Indo-Pakistan War of 1971-a Pakistan laka hnehna an chan ni leh tunhmaa East Pakistan, tuna Bangladesh lo ni ta lo pianchhuah ni hi a ni. He indona-ah hian Pakistan sipai te chu tlawm in an awp ram East Pakistan ti a hriat chu Bangladesh ti a hriatin a Io piang ta a. He mi tum hian Pakistan sipai lalber (Chief of the Pakistan Forces), General Amir Abdullah Khan Niazi chu a sipai 93,000 zet nen Allied Forces (India sipai leh Mukti Bahini) General Jagjit Singh Aurora kaihhruaina hnuaiah Ramna Race Course, tuna Suhrawary Udyan, Dhaka a awm kutah an in pe a. Hemi ni hi Bangladesh chuan Bijoy Dibos tih hming puin an lawm ve bawk thin a ni.