Latest News

Observer hovin Serchhip District-a Electoral Roll siamthat mek thlirho a ni

Electoral Roll Special Summary Revision neih meka Serchhip District tana Observer, Vanlalngaihsaka IAS chuan nimin khan Serchhip rawn tlawhin Election Department-a thawktute leh Political Party hruaitute nen Electoral Roll siamthat hna thawh mek chungchang an sawiho.

Serchhip DC Meeting Hall-a Special Summary Revision of Electoral Roll neih mek thlirhona hunah hian Mizoram sawrkar-a Secretary ni bawk, Vanlalngaihsaka chuan Election Commission of India chuan India khua leh tui dik tak, kum 18 tling chin te chu Electoral Roll-ah chuang vek se a duh rualin boral tawh leh paih ngai chi dangte pawh fel taka paiha, then thianghlim zel a duh thu sawiin, chumi atan chuan Electoral Roll pawh kumtin ennawn thin a nih thu a sawi a. Tunhma lamin Electoral Roll-a inthun thar chungchangah Political Party atangin thahnem ngaih luat avanga kum tling chiahlo thun tumna te, khua leh tui ni chiah lo thun tumna te pawh a awm thin thu sawiin, amaherawh chu thawktu hrang hrangte avangin tunah chuan kan Electoral Roll pawh a changkang in a felfai tawh hle tih a sawi a, Electoral Roll-a hming chuang te zawng zawng an thlalak nen dah vek an nih tawh thu a sawi bawk.

Electoral Roll leh Election te chu Political Party te ta liau liau-a ngaih theih a nih thu Observer chuan sawiin, Electoral Roll ennawn te, Strong Room hawn leh khar te leh hemi kaihhnawih te chu Political Party te tel ngeia tih thin a nih thu leh an tello chuan engmah kalpui hleih theih a nih loh thu a sawi a. Hei vang hian Political Party tin te thawhpuiah sawmin, Booth Level Agent (BLA) pawh kokim taka inruat vek turin a ngen a. “Khua leh tui ten Roll-a kan hming chuantir ngei hi kan chanvo a ni tih hrereng ila, chutihrualin inthlan hun a lo thlena vote thlak ngei pawh kan mawhphurhna a ni tih kan hriat tel a tul hle,” tiin khua leh tui dik tak nilote Roll-a thun lo tura fimkhur turin thawktute a chah bawk a ni.

He thutkhawm hi Serchhip District Election Officer, Kumar Abhishek chuan kaihruaiin Observer in Electoral Roll Revision-a thawktute leh Political Party aiawhte nena inhmuhkhawmna hun tha tak a buatsaih sak avangin lawmthu a sawi a, Electoral Roll fel fai leh thianghlim tak a awm theih nan a tul apiang thawh zel an tum thu a sawi bawk.

Serchhip Election Officer, Vanlalhmachhuana chuan Electoral Roll Revision kalpui mek dinhmun tlangpui tarlangin, Nov. 16, 2020-ah Draft Electoral Roll tarchhhuakin Pre-Revision Activities-ah New Serchhip Area-ah Polling Station dah belh a nih thu te, Service Voters chungchangte leh Revision kal meka dinhmun tlang-puite a tarlang a, tunah hian Electoral Roll-a luh thar dilna lut tawh chu 244 a nih thu a tarlang bawk.

Nimin a thutkhawm ah hian Serchhip Addl. DEO, Lalmuansanga Ralte bakah Serchhip bial-a ERO, Kulothungan A leh AERO Dr. Manasia Khaimeichho bakah Tuikum bial-a ERO C. Lalduhzuali te bakah Political Party INC, MNF leh ZPM aiawhte an tel a, Electoral Roll-a hriatfiah loh awm te in zawhfiah a ni bawk a ni.

Comments

Chhiar Hlawhte