Naktuk-ah North Vanlaiphai ah Vote thlak a ni dawn

North Vanlaiphai Village Council inthlanna a mipui ten naktuk, Dec. 10-a vote an thlak that leh tur atan inbuatsaihna peihfel thawhkhat a ni tawh.

Kumin August 27-a North Vanlaiphai Village Council inthlanna a vote tla te chhiar that a nih hnuah he inthlanna chu pawm a nih tak loh avangin State Election Commission in ruahmanna a siam angin naktuk Ningani, Dec. 10, 2020 khian mipui ten Vote an thlak leh dawn a, he inthlanna neih leh turah hian Returning Officer atan K. Laltlanmawia, SMS (Forestry), Agriculture Department chu ruat niin Asst. Returning Officer atan Samuel Saithuamliana, Lecturer, Govt. HSS Serchhip chu ruat a ni bawk.

He inthlanna neih leh turah hian mipuite tan Vote thlakna tur Polling Station pathum awm tura ruahman niin PRO pakhat theuh leh PO mi pahnih theuh, an vaiin mi 9 ruat an ni bawk a, heng bakah hian vote chhiar hna thawk turin Counting Supervisor leh Counting Assistant mi 10 ve ve ruatchhuah an ni bawk a, heng inthlan buaipui tura ruat te tan hian nimin leh niminpiah khan Training neih ni tawhin North Vanlaiphai SDO (Civil), Dorothy Muansangi chuan zirtirna a pe a, inthlan buaipuina kawnga an hriat tur pawimawh hrang hrang a zirtir a ni.