Latest News

Mizoram Police ten dan lova rawn lut Burmese Rohingya hmeichhia pariat te thla 20 an kawl tawh

Mizoram Police ten dan lova rawn lut Burmese Rohingya hmeichhia pariat (8) an man te chu thla 20 zet Vairengte Police kutah an awm tawh.

Rohingya hmeichhia te hi kum 18 atanga kum 22 inkar an ni a, nikum April ni 23 zan khan Mizoram Police te chuan an man a ni. Heng mite hi an insawi danin, Bangladesh Sabulara hmuna Kutupalong Refugee Camp-a awm an ni a. April ni 19, 2019 khan an Bazar tur chu mi tu tih hriatloh ten motor-ah hlangin an phur bo a, Silchar an thlenpui hnuah an thawmhnaw te thlak sak an ni a, heta tang hian Aizawl-a kalpui turin Sumo-ah phurh an ni chu Vairengte-ah hian man an ni.

Heng hmeichhiate phurhna Sumo khalhtu chuan Zemabawk Petrol Pump-ah heng Burmese Rohingya hmeichhia te hi an lo lam tur thu a hrilh niin a sawi a. Hetianga man an nih hnu hian Fast Tract Court, Kolasib-ah hruai nghal an ni a, Rs. 50 theuh chawitir an ni a. He case hi mihring hmanga sumdawnna (human trafficking) nia hriat ni mah se Police ten an chhuizui hnuah pawh a mawhphurtu tak hi hriat a ni ta lova, he thil kaihhnawihah hian man pawh an la awm chuang lo a ni.

Thudawnna in a sawi danin, heng hmeichhiate hi Observation Home emaw, Detention Centre pangngaiah dah lovin Vairengte Police Station-a Temporary Detention Centre-ah dah an ni a, Fencing a awm mumal lo nen hmeichhia an nih bawk si avangin mualpho hlau takin enkawl an ni thin a. A tir lamah chuan Lailapur atangin Muslim pawl thenkhatin an eitur leh chawhmeh te an pe ve thin a, tunah erawh chuan an pe ngai tawh lo nia thudawn a ni bawk. 

Vairengte Police te hian kum 2 dawn an kawl chhung hian an inenkawlna senso pawh Mizoram Home Department tan a hautak hle a. Chumai ni lovin tuna an awmna hi Temporary Detention Centre a nih vangin Jail tang anga khungbeh a rem lova, duh leh mamawh an neih reng avangin Bazar-a an kal turte pawh Police te venna hnuaiah zel tih a ngai a, hei hian Police indaihlohna a thlen nasa in an hnathawh kawngah pawh a ti thuanawp phah niin thudawnna chuan a sawi bawk.

Sawrkar laipui pawhin he thilah hian Myanmar sawrkar hotute a dawr reng a, Myanmar sawrkar pawhin tunhnai khan an zinga pakhat chu an ram mi a nih thu pawmin an rama kir leh turin phalna pawh a pe tawh a ni. Amaherawhchu, midang pasarih (7) te chungchangah hian inbiakna neih zel a ni a, File pawh Home Ministry lamah a thang mek niin Police hotute chuan sawiin, an vaia thawnlet theih hun an nghak niin an sawi bawk.

Comments

Chhiar Hlawhte