Latest News

Mizoram-ah COVID-19 hri kai hmuh belh zel an ni

Zirtawpni-a Mizoram-a Sample enfiah atangin COVID-19 hri kai 16 hmuh leh niin Inrinni-a Sample enfiah atangin hri kai 11 hmuh belh an ni bawk.

Zirtawpni khan ZMC Laboratory-ah Sample 234 enfiah niin heng atang hian COVID-19 hri kai mi 6 hmuhchhuah an ni a, District hrang hranga TrueNat Laboratory-ah Sample 219 enfiah niin hri kai mi pakhat hmuh a nih bakah Rapid Antigen Test hmanga Sample enfiah 503 atangin hri kai mi 9 hmuh an ni bawk a ni. Heng hri kai hmuhchhuah 16 zinga mi 8 te hi State pawn atanga rawn lut an ni a, mi pahnih te chu tunhnaia COVID-19 hri kai nunna chan ta chhungte niin midang 6 te hi Lawngtlai District-a tualchhung-a hri inkaichhawng te an ni thung.

Inrinni khan ZMC Laboratory-ah Sample 389 enfiah niin heng atang hian COVID-19 hri kai 7 hmuhchhuah leh an ni bawk a, District hrang hranga TrueNat Laboratory-a Sample enfiah 104 atangin hri kai hmuh thar an awm lova, Rapid Antigen Test hmanga Sample enfiah 541 atangin hri kai mi 4 hmuh an ni bawk. Inrinni-a ZMC Laboratory atanga hri kai hmuhchhuah 7 te hi tunhnaia State pawn atanga rawn haw vek an ni a, Rapid Antigen Test hmanga hri kai hmuhchhuah mi 4 te hi tualchhunga hri inkaichhawng te niin pakhat hi hri kaina hriat a ni lo thung.

Inrinni khan Mizoram-a COVID-19 hri kai mi 16 te chu enkawl dam niin anmahni enkawlna hmun a\anga chhuahtir an ni a, nimin khan mi 8 te enkawl dam leh niin heti hian nimin tlai dar 5:00 thleng khan Mizoram-a COVID-19 hri kai hmuhchhuah chu 4035 an tling ta a, an zinga 3844 te chu enkawl dam ni tawhin tunah hian hri kai enkawllai 184 an la awm mek a, hri kai hmuhchhuah a\anga zaa 95.26 te chu enkawl dam ni tawhin hri kai zingah nunna chan mi 7 an awm tawh bawk a ni.

India-ah COVID-19 hri kai nuai 98 an tling tawh :

India rama COVID-19 hri kai hmuhchhuah chu nuai 98 aiin an tam ta a, darkar 24 kalta chhung khan hri kai 30,254 hmuh belh leh an ni. Ministry of Health & Family Welfare chhinchhiahna atanga a lan dan danin darkar 24 kalta chhung khan India ramah Sample 10,14,434 enfiah leh niin heng atang hian COVID-19 hri kai 30,254 hmuh belh an ni a, heng te nen hian India rama COVID-19 hri kai hmuhchhuah zawng zawng chu 98,57,029 an tling tawh a ni.

Darkar 24 kalta chhung khan India ramah hri kai 33,136 te chu enkawl dam leh niin tun thlengin 93,57,464 enkawl dam an ni tawh a, hei hi hri kai hmuhchhuah atangin zaa 94.93 niin tunah hian hri kai enkawllai 3,56,546 an la awm a, tun thlengin hri kai zingah nunna chan 1,43,019 awm tawhin darkar 24 kalta chhung khan hri kai zingah nunna chan mi 391 an awm leh bawk a ni.

Comments

Chhiar Hlawhte