Latest News

Hunpui lai-a hri leng chungchanga hmalak dan tur sawihona Serchhip-ah neih a ni

Serchhip District Level Task Force on COVID-19 leh Serchhip khawpui chhunga VLTF aiawhte chu nimin khan thukhawmin COVID-19 dona kawnga hmalak dan an thlirho bakah Krismas leh kumthar vuakvet-a hmalak dan tur an sawiho.

He thutkhawm Serchhip DC Meeting Hall-a neih hi District Level Task Force on COVID-19 Chairman, Kumar Abhishek chuan kaihruaiin kumtir lam atanga COVID-19 an dona kawnga theihtawp chhuaha hnathawktu zawng zawngte chungah lawmthu a sawi. Bawrhsap hian India ram hmundangte thlirin he pui laiin he natna hi a darh hluai thin tih a chiang viau tih sawiin, hei vang hian kan hma lawka Krismas leh kumthar lo thleng turah hian COVID-19 laka himna dan te khauh zawka kan kenkawha, mipuite pawhin fimkhur lehzuala kan hun kan hman a tul dawn hle tih a sawi a. Kan zavaiin a mawhphurtu theuh kan ni tih hre chunga Dan kan zawm a tul a ni, tiin thawktute chu khauh zawka engkim kalpui tur leh mipuite chu dan zawm tha turin a chah a ni.

Hei bakah hian District Bawrhsap chuan thingtlang khaw hrang hrangte chu an khuaa haw duhte lo khap lo tur te, COVID Free Certificate lo phut lo turte in a chah nawn a, Mizoram chhunga awmsa te Mizoram chhunga an chetvel chu khapna engmah a awm lova, State pawn atanga lo haw te erawh chu kim takin khunghran zel an ni tih a sawi a. Mi tin te Krismas leh kumthar hlim tak leh him taka hmang vek turin duhsakna a hlan a ni.

He thutkhawm ah hian Addl. SP, PC. Laltanpuia MPS pawhin thusawiin, hunpui chhungin Police te theihtawp chhuahin an duty leh dawn tih a tarlan ga. Khawtin leh vengtin-a VLTF leh tlawmngai pawlte chu thawhpuiah sawmin, mipuite chu sawrkar thupek hrang hrangte tha taka zawm theuh turin a ngen bawk a. Serchhip CMO, Dr. Laldawngliana Sailo pawhin tunhnaiah COVID-19 vaccine sawi rik a ni nasa ta hle tih sawiin, amaherawh chu Vaccine awm mai tawh tura beisei vanga lo inthlahdul erawh thil tih chi a ni lo tih a sawi a. Vaccine a lo chhuak a nih pawhin a dawng hmasatu turte ruahman fel vek tawh a ni a, mipui nawlpuiin kan hmuh theih hun leh mi zawng zawng mamawh khawp kan neih theih hun a la hla hle thei tih sawiin, chuvang chuan hri laka himna tura pawimawh te chu zawm zel turin mipuite chu a chah bawk.

He Meeting-ah hian hunpui lo thleng tur vuakvet-a hmalak dan tur hrang hrang sawiho a ni a, hri leng laka mipuite an him theihna turin theihtawp chhuaha hmalak nise an ti a ni.

Comments

Chhiar Hlawhte