Latest News

Chhiahtlang-ah Field lai tan

Tuikum bialtu MLA leh Assembly Deputy Speaker, Er. Lalrinawma chuan nimin khan a bial chhung, Chhiahtlang khua-a MLA Fund hmanga Field laih tur chu tlawhin Field laih hna thawh bul a tanpui.

Nimin-a Chhiahtlang Field laih tur a tlawhna ah hian bialtu MLA leh Deputy Speaker, Er. Lalrinawma chuan Chhiahtlang khawtlang hruaituten hun rei tak atangin Field an neih theih nan hma an lo la tawh tih sawiin, ram te ngaihtuahin mimal in an ram te an pe a. Mipuite pawhin tha leh zung sengin hun rei tak atang tawhin hma an lo lak tawh a nih avangin tihpuitlin ngei chu tha a tih thu a sawi a. An bial chhungah Field puitling an neih loh avangin he Field tihpuitlin hi a pawimawh lehzual tih pawh sawiin, he Field hian infiamna lama tuihal thalai tam tak mamawh a phuhruk a beisei thu a sawi bawk.

Chhiahtlang-a Field hmun tur atan hian khawchhung-a mi thahnemngai ten ram te pein, kum 2000 chho atanga bul tan tawh a ni a. Hun rei tak khawih chhunzawm lohva a awm hnuah, nimin khan JCB pakhat leh Tipper pakhatin hna an thawk tan nghal a. Tun MLA term chhung ngeia laih zawhfel theih a nih a beisei thu Er. Lalrinawma chuan a sawi. He Field laih hna tanna hun ah hian khawtlang hruaitu, Tuikum Block MNF President leh Party hruaitu engemaw zat an tel bawk a ni.

Comments

Popular News (Last 30 Days)